కార్తీక స్నానానికి వెళ్లి గోదావరిలో ఆటో డ్రైవర్ మృతి
బోధన్, నవంబర్ 22 (విజయక్రాంతి): గోదావరి నదిలో స్నానానికి వెళ్లిన ఓ ఆటో డ్రైవర్ ప్రమాదవశాత్తు నీటిలో మునిగి మృతి చెందిన విషాద ఘటన నిజామాబాద్ జిల్లా రెంజల్ మండలం కందకుర్తి వద్ద ఆదివారం చోటుచేసుకుంది.
స్థానికులు తెలిపిన వివరాల ప్రకారం.. రుద్రూర్కు చెందిన నీలం అనిల్ ఆటో డ్రైవర్గా జీవనం సాగిస్తున్నాడు. ఆదివారం కార్తీక మాసం (Karthika Masam) సందర్భంగా భక్తులను తన ఆటోలో కందకుర్తి గోదావరి నది (Godavari River) వద్దకు స్నానాల కోసం తీసుకువచ్చాడు. భక్తులతో కలిసి తాను కూడా పవిత్ర స్నానం ఆచరించేందుకు నదిలోకి దిగాడు. ఈ క్రమంలో ప్రమాదవశాత్తు నదిలోని ఊబిలో చిక్కుకొని బయటకు రాలేక నీటిలో మునిగి ప్రాణాలు కోల్పోయాడు.
ఈ ఘటనతో తోటి భక్తులు, స్థానికులు తీవ్ర దిగ్భ్రాంతికి గురయ్యారు. మృతుడి కుటుంబ సభ్యులకు విషయం తెలియడంతో ఆ కుటుంబంలో విషాదఛాయలు అలముకున్నాయి. కార్తీక మాసంలో గోదావరి స్నానాలకు వచ్చే భక్తులు నది లోతు (Water Depth), ఊబి ప్రాంతాల పట్ల అప్రమత్తంగా ఉండాలని స్థానికులు సూచిస్తున్నారు. భద్రతా జాగ్రత్తలు (Safety Precautions) పాటించాలని కోరుతున్నారు.