ప్రపంచ దేశాలకు ముందస్తు హెచ్చరిక

ఎల్‌నినోపై WMO సంచలన హెచ్చరిక.. 2027 వరకు వాతావరణంపై ప్రభావం!

ప్రపంచ వాతావరణంలో భారీ మార్పులు చోటుచేసుకునే అవకాశాలున్నాయని ప్రపంచ వాతావరణ సంస్థ (WMO) హెచ్చరించింది. ప్రస్తుతం కొనసాగుతున్న ఎల్‌నినో (El Niño) ఈసారి గత నాలుగు దశాబ్దాలుగా ఉపయోగిస్తున్న పర్యవేక్షణ చార్టుల అంచనాలను మించే స్థాయికి చేరవచ్చని తాజా Global Seasonal Climate Update వెల్లడించింది. ఈ ప్రభావం 2027లోనూ కొనసాగవచ్చని అంచనా వేసింది. దీంతో ప్రపంచవ్యాప్తంగా ఉష్ణోగ్రతలు, వర్షపాతం, వాతావరణ పరిస్థితులపై ఆందోళన పెరుగుతోంది. అయితే ఎల్‌నినో ప్రభావం ప్రతి ప్రాంతంలో ఒకేలా ఉండదని, స్థానిక పరిస్థితులను బట్టి మారుతుందని నిపుణులు స్పష్టం చేస్తున్నారు.

WMO విడుదల చేసిన తాజా అంచనాల ప్రకారం, 2026 నవంబర్ నుంచి 2027 జనవరి మధ్య ఉష్ణమండల పసిఫిక్ మహాసముద్ర ఉపరితల ఉష్ణోగ్రతలు సాధారణ స్థాయి కంటే సుమారు 3.8 డిగ్రీల సెల్సియస్ ఎక్కువగా ఉండే అవకాశం ఉంది. ఈ పరిణామం 2026 చివర్లో గరిష్ఠ స్థాయికి చేరవచ్చని అంచనా. ఎల్‌నినో ప్రభావంతో కొన్ని ప్రాంతాల్లో తీవ్రమైన వేడి, వర్షాభావ పరిస్థితులు ఏర్పడవచ్చు. మరికొన్ని ప్రాంతాల్లో భారీ వర్షాలు, వరదల ముప్పు పెరగవచ్చు. ఈ మార్పులు వ్యవసాయం, నీటి లభ్యత, ఆహార భద్రతపై ప్రభావం చూపే అవకాశముంది. అయితే ఇవి Seasonal Forecasts మాత్రమేనని, నిర్దిష్ట ప్రాంతంలో ఎప్పుడు ఏ విపత్తు సంభవిస్తుందో ఈ అంచనాలు ఖచ్చితంగా చెప్పలేవని WMO పేర్కొంది.

మరోవైపు, ఎల్‌నినో ప్రభావంతో ఇప్పటికే సంక్షోభాలను ఎదుర్కొంటున్న ప్రజలకు మరిన్ని ఇబ్బందులు తలెత్తకుండా ముందస్తు చర్యలు తీసుకోవాలని WMO, ఐక్యరాజ్యసమితి మానవతా వ్యవహారాల విభాగం (UN OCHA) పిలుపునిచ్చాయి. ముఖ్యంగా శరణార్థులు, ఘర్షణ ప్రభావిత ప్రాంతాల ప్రజలు, నిరాశ్రయులైన కుటుంబాలకు రక్షణ కల్పించాల్సిన అవసరాన్ని గుర్తుచేశాయి. వాతావరణ హెచ్చరికలను ముందుగానే అందిపుచ్చుకుని ప్రభుత్వాలు, సహాయక సంస్థలు సిద్ధమైతే ప్రాణనష్టం, ఆస్తి నష్టాన్ని తగ్గించవచ్చని సూచించాయి. అందువల్ల రాబోయే నెలల్లో వాతావరణ పరిస్థితులను నిశితంగా గమనించడం, అధికారిక సూచనలను అనుసరించడం కీలకం కానుంది.