పవన్ కల్యాణ్ తొలి పరిచయానికి 30 ఏళ్లు
పవర్‌స్టార్‌ పవన్ కల్యాణ్ సినీ ప్రయాణంలో తొలి అడుగుగా నిలిచిన ‘అక్కడ అమ్మాయి ఇక్కడ అబ్బాయి’ సినిమా విడుదలై 30 ఏళ్లు పూర్తయ్యాయి. ఆయన స్టైల్‌, మ్యానరిజమ్స్‌, యాక్షన్‌ సన్నివేశాలకు అభిమానులు ఇప్పటికీ ఫిదా అవుతుంటారు. ఈ నేపథ్యంలో పవన్ హీరోగా పరిచయమైన తొలి సినిమా జ్ఞాపకాలు మరోసారి అభిమానుల్లో చర్చనీయాంశంగా మారాయి.
1996లో విడుదలైన ఈ ప్రేమకథా చిత్రానికి ఈవీవీ సత్యనారాయణ దర్శకత్వం వహించారు. పవన్ కల్యాణ్ హీరోగా, సుప్రియ హీరోయిన్‌గా నటించారు. ఇద్దరికీ ఇదే తొలి సినిమా కావడం విశేషం. అక్కినేని నాగేశ్వరరావు మనవరాలు, నటుడు సుమంత్‌ సోదరి అయిన సుప్రియ ఈ చిత్రంతోనే కథానాయికగా వెండితెరకు పరిచయమయ్యారు.
తొలి చిత్రమైనప్పటికీ పవన్ కల్యాణ్ యాక్షన్‌ సన్నివేశాలు ప్రేక్షకులను ఆకట్టుకున్నాయి. అప్పట్లో ఆయన చేసిన ఫైట్లు, తెరపై చూపించిన ఉత్సాహం అభిమానుల్లో ప్రత్యేక ఆసక్తిని కలిగించాయి. ఆ తర్వాతి కాలంలో పవర్‌స్టార్‌గా ఆయనకు ఏర్పడిన యాక్షన్‌ ఇమేజ్‌కు ఈ సినిమా ఓ ముఖ్యమైన ఆరంభంగా నిలిచిందని అభిమానులు గుర్తుచేసుకుంటున్నారు.
ప్రేమకథకు తోడు పాటలు, వినోదాత్మక సన్నివేశాలు ఈ సినిమాకు ప్రత్యేక ఆకర్షణగా నిలిచాయి. 90వ దశకంలోని సినిమా వాతావరణం, అప్పటి సంగీతం, పవన్ కల్యాణ్ తొలి చిత్రం అనే ప్రత్యేకత ప్రేక్షకులకు మధుర జ్ఞాపకాలను అందించాయి.
‘అక్కడ అమ్మాయి ఇక్కడ అబ్బాయి’ 1988లో విడుదలైన అమీర్‌ ఖాన్‌, జూహీ చావ్లా నటించిన హిందీ చిత్రం ‘ఖయామత్‌ సే ఖయామత్‌ తక్‌’ ఆధారంగా రూపొందింది. తెలుగు ప్రేక్షకుల అభిరుచికి అనుగుణంగా కథను తెరకెక్కించారు.
మూడు దశాబ్దాల సినీ ప్రయాణంలో పవన్ కల్యాణ్ ఎన్నో మైలురాళ్లను అధిగమించారు. తొలి సినిమాతో ప్రారంభమైన ఆయన ప్రస్థానం భారీ అభిమానగణం, ప్రత్యేకమైన స్టార్‌డమ్‌ వరకు చేరింది. అందుకే ‘అక్కడ అమ్మాయి ఇక్కడ అబ్బాయి’ (Akkada Ammayi Ikkada Abbayi) అభిమానులకు కేవలం సినిమా మాత్రమే కాదు.. ఆయన సినీ ప్రస్థానాన్ని గుర్తుచేసే ప్రత్యేక జ్ఞాపకం.
మూడు దశాబ్దాల క్రితం వెండితెరపై అడుగుపెట్టిన యువ హీరో.. నేడు కోట్లాది మంది అభిమానించే పవర్‌స్టార్‌గా ఎదిగారు. తొలి సినిమా నుంచి ఇప్పటివరకు పవన్ కల్యాణ్ సాగించిన ప్రయాణం అభిమానులకు ఎప్పటికీ ప్రత్యేకమే
