మెదడు చచ్చిపోతుందనే భయం
జెన్‌-జీకి ఏఐ అలవాటు.. పెద్దలకు మాత్రం డేటా భయం!
ఏఐతో పని సులువు.. కానీ ఆలోచించే శక్తి తగ్గిపోతుందనే భయం! ఒకవైపు చదువు, ఉద్యోగం, వ్యక్తిగత నిర్ణయాల కోసం Artificial Intelligence (AI) సాధనాలను విస్తృతంగా ఉపయోగిస్తున్న యువత.. మరోవైపు అవే తమ సొంత ఆలోచనలను బలహీనపరుస్తాయేమోనని ఆందోళన చెందుతోంది. హార్వర్డ్ బిజినెస్ స్కూల్ పబ్లిషింగ్, గాలప్ సంస్థలు విడుదల చేసిన నివేదిక ప్రకారం, అమెరికాలోని యువతలో 74 శాతం మంది గత నెలలో కనీసం ఒక్కసారైనా AI Chatbots ఉపయోగించారు. వీరిలో 65 శాతం మంది సంప్రదాయ Search Enginesకు బదులుగా, 52 శాతం మంది ఆఫీస్ పనుల కోసం, 46 శాతం మంది రాతపని కోసం ఏఐ సాయం తీసుకున్నట్లు సర్వే తెలిపింది.
అంతేకాదు, 32 శాతం మంది వ్యక్తిగత సలహాల కోసం, 23 శాతం మంది స్నేహితుడిలా, 10 శాతం మంది ప్రేమ భాగస్వామిలా భావించి ఏఐతో సంభాషించినట్లు వెల్లడైంది. అయితే, ఏఐ మనుషులను సోమరులుగా మారుస్తుందనే ఆందోళన 79 శాతం మందిలో ఉండగా, Critical Thinking సామర్థ్యం తగ్గుతుందనే భయం 62 శాతం మందిలో కనిపించింది. విద్యార్థులు చదువులో ఏఐపై అతిగా ఆధారపడితే సొంతంగా నేర్చుకునే అలవాట్లు ప్రభావితమవుతాయనే చర్చ కూడా పెరుగుతోంది. మరోవైపు, వయసు పైబడిన వారిలో AI Awareness, Data Privacy, Digital Skills అంశాలు కీలకంగా మారాయి. ఈవై, మైక్రోసాఫ్ట్, ఓపెన్‌ఏఐ సంయుక్తంగా నిర్వహించినట్లు పేర్కొన్న సర్వేలో 60–85 ఏళ్ల వయసు వారిలో 69 శాతం మందికి ఏఐపై పరిమిత అవగాహన ఉన్నట్లు వెల్లడైంది.
అయినప్పటికీ, ఈ టెక్నాలజీని నేర్చుకోవాలనే ఆసక్తి చాలామందిలో ఉన్నట్లు నివేదిక సూచించింది. ఏ పనికి ఏ AI Tool ఉపయోగించాలో తెలియక 34 శాతం మంది గందరగోళానికి గురవుతున్నారని, వ్యక్తిగత సమాచారం భద్రతపై ఆందోళన కూడా వినియోగానికి అడ్డంకిగా ఉందని తెలిపింది. ఆన్‌లైన్ శిక్షణ, సులభమైన మార్గదర్శకాలు అందుబాటులోకి వస్తే ఏఐని నేర్చుకోవడం సులభమవుతుందని పలువురు అభిప్రాయపడుతున్నారు. మొత్తంగా, ఏఐని పూర్తిగా దూరం పెట్టడం లేదా దానిపైనే ఆధారపడటం కాకుండా, సమాచారం నిజమో కాదో పరిశీలించడం, వ్యక్తిగత వివరాలు పంచుకోకుండా ఉండటం, సొంతంగా ఆలోచించిన తర్వాతే AI Assistance తీసుకోవడం ముఖ్యమని నిపుణులు సూచిస్తున్నారు.
