ఆధిక్యంలో ఉండి.. అనూహ్య ఓటమి!

నగోయా: ఆసియా క్రీడల్లో భారత బాక్సర్ సుమిత్(Indian boxer Sumit)కు ఊహించని ఎదురుదెబ్బ తగిలింది. పురుషుల 70 కిలోల విభాగం ప్రిక్వార్టర్‌ఫైనల్లో ఇరాక్ బాక్సర్ అల్ సర్రే అలీ ఖాసిమ్ హమ్దాన్(Ali Qasim Hamdan) తో తలపడిన సుమిత్ గాయం కారణంగా బౌట్‌ను మధ్యలోనే ముగించాల్సి వచ్చింది. తొలి రెండు రౌండ్లలో సుమిత్ ఆధిపత్యం ప్రదర్శించాడు. దీంతో పోరులో భారత బాక్సర్ ముందంజలో ఉన్నాడు. అయితే మూడో రౌండ్‌లో ప్రత్యర్థి పంచ్‌ను ఎదుర్కొన్న సమయంలో సుమిత్ అదుపుతప్పి పడిపోయాడు. ఈ క్రమంలో అతడి మోకాలికి గాయం కావడంతో పోరును కొనసాగించడం సాధ్యం కాలేదు.

గాయం తీవ్రతను గమనించిన రిఫరీ బౌట్‌ను నిలిపివేయడంతో అల్ సర్రే అలీ ఖాసిమ్ హమ్దాన్‌ను విజేతగా ప్రకటించారు. ఆధిక్యంలో ఉండి కూడా గాయం కారణంగా పోటీ నుంచి తప్పుకోవాల్సి రావడం సుమిత్‌కు తీవ్ర నిరాశను మిగిల్చింది. అంతకుముందు జరిగిన తొలి రౌండ్‌లో సుమిత్ అద్భుత ప్రదర్శన చేశాడు. థాయ్‌లాండ్‌కు చెందిన బుంజోంగ్ సిన్‌సిరిపై 5-0తో స్పష్టమైన విజయం సాధించి ప్రిక్వార్టర్‌ఫైనల్‌కు చేరుకున్నాడు. అయితే రెండో బౌట్‌లో గాయం అతడి పతక ఆశలను దెబ్బతీసింది. బరిలో పోరాడుతూ గాయపడటంతో సుమిత్ ఆసియా క్రీడల ప్రయాణం అనూహ్యంగా ముగిసింది.