దసరాకైనా బకాయిలు అందేనా?
ఇల్లెందు టౌన్, అక్టోబర్ 12 (విజయక్రాంతి): కోయగూడెం ఎల్‌ఎస్‌ఎన్‌ కంపెనీలో పనిచేసిన కార్మికులకు రావాల్సిన వేతనాలు, బోనస్‌, ఈపీఎఫ్‌ బకాయిలను వెంటనే చెల్లించాలని కోరుతూ కార్మిక సంఘాల జేఏసీ (JAC) నాయకులు సోమవారం ఇల్లెందు సింగరేణి జీఎం వీసం కృష్ణయ్యకు వినతిపత్రం సమర్పించారు.
ఈ సందర్భంగా ఏఐటీయూసీ రాష్ట్ర సమితి సభ్యుడు దేవరకొండ శంకర్‌, ఐఎఫ్‌టీయూ రాష్ట్ర నాయకుడు డి.ప్రసాద్‌ మాట్లాడుతూ, కార్మికులతో పని చేయించుకున్న ఎల్‌ఎస్‌ఎన్‌ యాజమాన్యం వారికి చెల్లించాల్సిన బకాయిల విషయంలో నిర్లక్ష్యం వహిస్తోందని ఆరోపించారు. వేతనాల చెల్లింపులో పలుమార్లు వాయిదాలు పడటంతో కార్మికులు తీవ్ర ఇబ్బందులు ఎదుర్కొంటున్నారని తెలిపారు.
సమస్య మరింత జటిలం కాకముందే కార్మికులకు రావాల్సిన బకాయిలు చెల్లించేలా చర్యలు తీసుకోవాలని కోరారు. కార్మికుల వేతనాలు, ఇతర బకాయిల చెల్లింపులపై (Pending Dues) తగిన చర్యలు తీసుకోవాలని విజ్ఞప్తి చేశారు. దసరా నాటికి వేతనాలు, ఇతర బకాయిలు ఇప్పించేందుకు కృషి చేస్తానని జీఎం హామీ ఇచ్చినట్లు జేఏసీ నాయకులు వెల్లడించారు. ఈ కార్యక్రమంలో సింగరేణి కాలరీస్‌ వర్కర్స్‌ యూనియన్‌ (ఏఐటీయూసీ) బ్రాంచ్‌ అధ్యక్షుడు నజీర్‌ అహ్మద్‌, టీయూసీఐ జిల్లా నాయకుడు కె.రఘు తదితరులు పాల్గొన్నారు.
