విద్యుత్ సమస్యలపై బీజేపీ ధర్నా

సుల్తానాబాద్, సెప్టెంబర్ 30(విజయక్రాంతి): విద్యుత్ సమస్యల పరిష్కారంలో కాంగ్రెస్ ప్రభుత్వం విఫలమైందని మల్కాజిగిరి పార్లమెంట్ సభ్యులు ఈటల రాజేందర్ ఆరోపించారు. భారతీయ జనతా పార్టీ రాష్ట్ర, జిల్లా శాఖల పిలుపు మేరకు రైతులు ఎదుర్కొంటున్న సమస్యలు, విద్యుత్ సమస్యల పరిష్కారం కోసం పెద్దపల్లి జిల్లా సుల్తానాబాద్ మున్సిపల్ పరిధిలోని సుగ్లాంపల్లి 132/33 కేవీ విద్యుత్ సబ్‌స్టేషన్ (Power Substation) ఎదుట బీజేపీ మండల అధ్యక్షులు కందుల శ్రీనివాస్ ఆధ్వర్యంలో ధర్నా నిర్వహించారు.

ఈ కార్యక్రమానికి ఈటల రాజేందర్‌తో పాటు టీచర్స్ ఎమ్మెల్సీ మల్క కొమురయ్య, బీజేపీ పెద్దపల్లి జిల్లా అధ్యక్షులు కర్రె సంజీవరెడ్డి తదితరులు హాజరయ్యారు. ఈ సందర్భంగా ఈటల రాజేందర్ మీడియాతో మాట్లాడుతూ రైతులు ఎదుర్కొంటున్న సమస్యలు, విద్యుత్ సరఫరాలో ఇబ్బందులు, వ్యవసాయ రంగానికి సంబంధించిన అంశాలను ప్రస్తావించారు. రైతులకు అవసరమైన విద్యుత్‌ను నిరంతరాయంగా అందించాల్సిన బాధ్యత ప్రభుత్వంపై ఉందన్నారు.

ప్రస్తుత విద్యుత్ సమస్యలతో రైతులు ఇబ్బందులు పడుతున్నారని, వ్యవసాయానికి అవసరమైన విద్యుత్ సరఫరా (Power Supply) విషయంలో ప్రభుత్వం తగిన చర్యలు తీసుకోవాలని డిమాండ్ చేశారు. రైతుల సమస్యలను పరిష్కరించడంతో పాటు విద్యుత్ సరఫరాను మెరుగుపరచాలని కోరారు. రైతుల సమస్యల పరిష్కారం కోసం బీజేపీ ప్రజల తరఫున నిరంతరం పోరాటం చేస్తుందని నాయకులు తెలిపారు.

సీఎం వ్యాఖ్యలపై బీజేపీ జిల్లా అధ్యక్షుడి ఖండన

పెద్దపల్లి జిల్లా అధ్యక్షులు కర్రె సంజీవరెడ్డి మాట్లాడుతూ హిందూ దేవుళ్లపై సీఎం చేసిన వ్యాఖ్యలను తీవ్రంగా ఖండిస్తున్నట్లు తెలిపారు. ఇలాంటి వ్యాఖ్యలు మరోసారి చేయొద్దని హెచ్చరించారు. అనంతరం ఎలక్ట్రిసిటీ డీఈకి (Electricity DE) వినతిపత్రం అందజేశారు.

ఈ ధర్నా కార్యక్రమంలో కిసాన్ మోర్చా జిల్లా అధ్యక్షులు కట్కూరి సత్యనారాయణరెడ్డి, జిల్లా ఉపాధ్యక్షులు సౌదరి మహేందర్, కాసగోని నిర్మల, జిల్లా కార్యదర్శి శివంగారి సతీష్, యువ మోర్చా జిల్లా అధ్యక్షులు రామగిరి అఖిల్, మహిళా మోర్చా జిల్లా ప్రధాన కార్యదర్శి బండారి లత, మన్ కీ బాత్ జిల్లా కన్వీనర్ మిట్టపల్లి ప్రవీణ్‌కుమార్, మండల ప్రధాన కార్యదర్శులు కోట నాగేశ్వర్, కొల్లూరి సంతోష్, సేవా సంకల్ప్ అభియాన్ జిల్లా కన్వీనర్ ఊషణ అన్వేష్ యాదవ్, మాజీ మండల అధ్యక్షులు వేల్పుల రాజన్న పటేల్, కిసాన్ మోర్చా మండల అధ్యక్షులు మెండే శంకరయ్య, యువ మోర్చా అధ్యక్షులు కొమ్మిడి రాజేందర్‌రెడ్డి, మహిళా మోర్చా అధ్యక్షురాలు మల్క భాగ్యలక్ష్మి, బీజేపీ నాయకులు మేకల కార్తీక్ యాదవ్, సమ్మిరెడ్డి, పెర్క రమేష్, దాసరి వెంకటేష్, ఎర్రం సంతోష్‌రెడ్డి, కొంగర అనిల్, గాజే భాస్కర్‌రెడ్డి, ఆకుల లక్ష్మణ్, పొలం వేణు, వడ్లకొండ శశి, దాసరి పూర్ణచందర్, నేరెళ్ల శ్రీనివాస్, సుబ్బని సురేష్, ఈర్ల ప్రశాంత్, కార్యకర్తలు, రైతులు తదితరులు పాల్గొన్నారు.