ఉక్కు మనిషికి నివాళి
ముకరంపుర, అక్టోబర్ 31 (విజయక్రాంతి): భారత తొలి ఉప ప్రధాని, 'ఉక్కు మనిషి' సర్దార్ వల్లభాయ్ పటేల్ (Sardar Vallabhbhai Patel) 151వ జయంతి (151st Birth Anniversary) సందర్భంగా కరీంనగర్‌లోని చైతన్యపురి కాలనీలో గల కేంద్ర హోం శాఖ సహాయ మంత్రి బండి సంజయ్ కుమార్ క్యాంపు కార్యాలయంలో పటేల్ చిత్రపటానికి పూలమాలలు వేసి ఘనంగా నివాళులర్పించారు.
ఈ సందర్భంగా నగర మేయర్ కొలగాని శ్రీనివాస్, బీజేపీ రాష్ట్ర అధికార ప్రతినిధి, డిప్యూటీ మేయర్ యాదగిరి సునీల్ రావు, బీజేపీ జిల్లా అధ్యక్షులు సాయిని మల్లేశం, కార్పొరేటర్లు బోయినపల్లి ప్రవీణ్ రావు, బారీ జితేందర్, ఇతర నాయకులు పాల్గొని సర్దార్ పటేల్ సేవలను స్మరించుకుంటూ నివాళులర్పించారు.
ఈ సందర్భంగా వారు మాట్లాడుతూ.. 560కు పైగా సంస్థానాలను భారతదేశంలో విలీనం చేసి అఖండ భారతావనిని నిర్మించిన మహానీయుడు సర్దార్ వల్లభాయ్ పటేల్ అని కొనియాడారు. దేశ ఐక్యత, సమగ్రతల (National Unity and Integrity) కోసం ఆయన చూపిన మార్గం అందరికీ మార్గదర్శకమని తెలిపారు.
ఆపరేషన్ పోలో (Operation Polo) ద్వారా హైదరాబాద్ సంస్థానాన్ని భారత యూనియన్‌లో విలీనం చేయడంలో ఆయన వహించిన పాత్ర చారిత్రాత్మకమైనదని అన్నారు. రైతులకు మద్దతుగా 1928లో చేపట్టిన బర్డోలీ సత్యాగ్రహాన్ని విజయవంతంగా నడిపించినందుకే ఆయనకు "సర్దార్" అనే బిరుదు లభించిందని తెలిపారు.
