అద్వానీ హెల్త్‌ బులెటిన్‌.. ఏం చెప్పారంటే?

బీజేపీ సీనియర్‌ నేత, మాజీ ఉప ప్రధాని లాల్‌కృష్ణ అద్వానీ (Lal Krishna Advani) అస్వస్థతకు గురయ్యారు. ఛాతీలో ఇన్ఫెక్షన్‌ (Chest Infection) తలెత్తడంతో శుక్రవారం సాయంత్రం ఢిల్లీలోని అపోలో ఆస్పత్రిలో ఆయనను చేర్పించారు. ప్రస్తుతం ఐసీయూలో వైద్యుల పర్యవేక్షణలో చికిత్స పొందుతున్నారు. 98 ఏళ్ల అద్వానీ ఆరోగ్య పరిస్థితి ప్రస్తుతం నిలకడగా ఉందని ఆస్పత్రి వైద్యులు వెల్లడించారు. ఆయన ఆరోగ్యాన్ని ఎప్పటికప్పుడు పర్యవేక్షిస్తూ అవసరమైన వైద్య సేవలు అందిస్తున్నారు.అపోలో ఆస్పత్రి విడుదల చేసిన హెల్త్‌ బులెటిన్‌ (Health Bulletin) ప్రకారం.. శుక్రవారం సాయంత్రం 7.30 గంటల సమయంలో అద్వానీని ఆస్పత్రికి తీసుకొచ్చారు. న్యూరాలజీ సీనియర్‌ కన్సల్టెంట్‌ డాక్టర్‌ వినీత్‌ సూరి నేతృత్వంలోని వైద్యుల బృందం ఆయనకు చికిత్స అందిస్తోంది. ప్రస్తుతం ఆయన ఆరోగ్యం నిలకడగా ఉన్నప్పటికీ, వైద్యులు పరిస్థితిని నిశితంగా పరిశీలిస్తున్నారు. చికిత్సకు సంబంధించిన మరిన్ని వివరాలు ఆస్పత్రి వర్గాలు వెల్లడించాల్సి ఉంది.

అద్వానీ ఆస్పత్రిలో చేరిన విషయం తెలుసుకున్న కేంద్ర మంత్రి, బీజేపీ సీనియర్‌ నేత జేపీ నడ్డా వెంటనే ఆస్పత్రికి వెళ్లారు. ఆయనను పరామర్శించి ఆరోగ్య పరిస్థితిని అడిగి తెలుసుకున్నారు. వైద్యులతో మాట్లాడి అందిస్తున్న చికిత్స వివరాలపై ఆరా తీశారు. మరోవైపు, అద్వానీ ఆరోగ్య పరిస్థితిపై బీజేపీ నాయకులు, కార్యకర్తలు, అభిమానులు ఆందోళన వ్యక్తం చేస్తూ ఆయన త్వరగా కోలుకోవాలని ఆకాంక్షిస్తున్నారు.కొద్ది రోజుల క్రితమే ప్రధానమంత్రి నరేంద్ర మోదీ అద్వానీని కలిశారు. ప్రభుత్వ ప్రధాన పదవుల్లో మోదీ 25 ఏళ్లు పూర్తి చేసుకున్న సందర్భంగా అక్టోబర్‌ 7న ఢిల్లీలోని అద్వానీ నివాసానికి వెళ్లి ఆయన ఆశీస్సులు తీసుకున్నారు. ఈ సందర్భంగా అద్వానీ దేశానికి అందించిన సేవలను మోదీ కొనియాడారు. దశాబ్దాల పాటు ఆయన చేసిన ప్రజాసేవ భారత చరిత్రపై గణనీయమైన ప్రభావం చూపిందని సామాజిక మాధ్యమాల్లో పేర్కొన్నారు.

భారత రాజకీయాల్లో లాల్‌కృష్ణ అద్వానీకి ప్రత్యేక గుర్తింపు ఉంది. బీజేపీని దేశవ్యాప్తంగా బలమైన రాజకీయ శక్తిగా తీర్చిదిద్దడంలో ఆయన కీలక పాత్ర పోషించారు. పలుమార్లు పార్టీ జాతీయ అధ్యక్షుడిగా బాధ్యతలు నిర్వర్తించారు. 2002 నుంచి 2004 వరకు దేశ ఉప ప్రధానిగా సేవలందించారు. కేంద్ర హోంమంత్రిగా, సమాచార ప్రసార శాఖ మంత్రిగా కూడా కీలక బాధ్యతలు చేపట్టారు.తన సుదీర్ఘ రాజకీయ ప్రస్థానంలో అద్వానీ ఏడుసార్లు లోక్‌సభ సభ్యుడిగా, నాలుగుసార్లు రాజ్యసభ సభ్యుడిగా ఎన్నికయ్యారు. ప్రస్తుతం ఆయన ఆస్పత్రిలో చికిత్స పొందుతున్న నేపథ్యంలో, త్వరగా కోలుకోవాలని బీజేపీ శ్రేణులు, అభిమానులు ఆకాంక్షిస్తున్నారు.