కొణిజర్ల : ఖమ్మం జిల్లా కొణిజర్ల మండలంలో శనివారం విషాదం చోటుచేసుకుంది. టీఎస్ ఆర్టీసీ బస్సులోంచి జారిపడి యువతి దుర్మరణం పాలైంది.  బస్సులోంచి కిందపడిన యువతిపై నుంచి వెనుక టైరు వెళ్లింది. కొణిజర్ల మండలం పరిషత్ కార్యాలయం సమీపంలో ఈ ఘటన చోటుచేసుకుంది. మృతురాలిని కొణిజర్ల మండలం పెద్దమునగాలకు చెందిన అనూష(26)గా గుర్తించారు.

ఎదురుగా వస్తున్న వాహనాన్ని తప్పించబోయి డ్రైవర్ సడన్ బ్రేక్ వేశాడు. బ్రేక్ వేయడంతో బస్సు పుట్ బోర్డుపై నించున్న యువతి కిందపడిపోయింది. దీంతో ఈ ప్రమాదం జరిగింది. స్థానికుల సమాచారంతో ఘటనాస్థలికి చేరుకున్న పోలీసులు కేసు నమోదు చేసుకుని మృతదేహాన్ని శవపరీక్ష నిమిత్తం మార్చురీకి తరలించారు.