‘విరూపాక్ష’, ‘బ్రో’ చిత్రాల తర్వాత హీరో సాయి దుర్గ తేజ్ (సాయి ధరమ్ తేజ్) నటిస్తున్న పాన్ ఇండియా సినిమా ఇటీవల ప్రారంభమైంది. దాంతోపాటు తాజాగా రోహిత్ కేపీ దర్శకుడిగా పరిచయమవుతున్న చిత్రంతో సాయి దుర్గ తేజ్ ప్రేక్షకుల ముందుకు రానున్నాడు. ప్రైమ్ షో ఎంటర్‌టైన్‌మెంట్స్ పతాకంపై కె. నిరంజన్‌రెడ్డి, చైతన్యరెడ్డి నిర్మిస్తున్న ఈ సినిమా అనౌన్స్‌మెంట్ పోస్టర్ శుక్రవారం విడుదలైంది. ఓ యూనివర్సల్ కాన్సెఫ్ట్‌తో ఈ చిత్రాన్ని రూపొందిస్తున్నట్టు తెలుస్తోంది.

‘ఈ పీరియాడికల్ యాక్షన్ డ్రామాలో సాయి దుర్గ తేజ్ పాత్ర చాలా శక్తిమంతంగా ఉంటుంది. ప్రత్యేకంగా తయారు చేసిన ఓ భారీ సెట్‌లో తొలి షెడ్యూల్ చిత్రీకరిస్తున్నాం’ అని నిర్మాతలు వెల్లడించారు. ఇంకా టైటిల్ ఖరారు కానందున ‘ఎస్‌డీటీ 18’గా ప్రచారంలో ఉన్న ఈ చిత్రం తెలుగు, తమిళ, హిందీ, కన్నడ, మలయాళంలో విడుదల కానుంది.