‘కల్కి 2898ఏడీ’ విజయం తర్వాత దర్శకుడు నాగ్ అశ్విన్ పేరు అన్ని భారతీయ పరిశ్రమల్లోనే కాక ప్రపంచ స్థాయిలో మార్మోగిపోయింది. అటు బలమైన స్త్రీ పాత్రలను పోషించడంలో బాలీవుడ్ నటి ఆలియా భట్ పేరు గడించింది. ఇందుకు.. ఆమె లీడ్ రోల్‌లో నటించిన ‘జిగ్రా’ చక్కటి ఉదాహరణ. అయితే, వీరిద్దరు ఓ భారీ ప్రాజెక్టు కోసం పనిచేస్తున్నారనే వార్త ప్రస్తుతం సినీ ప్రియులను సంభ్రమాశ్చర్యానికి గురిచేస్తోంది.

ఈ మహిళా ప్రాధాన్య చిత్రంలోని పాత్ర కోసం బాలీవుడ్ నటి అలియా భట్‌తో నాగ్ అశ్విన్ చర్చలు జరుపుతున్నారట. అశ్విన్ శక్తిమంతమైన మహిళా ప్రధాన పాత్రపై దృష్టి సారించే ఓ స్క్రిప్ట్‌ను రూపొందించారని ఈ ప్రాజెక్టు వర్గాల ద్వారా తెలుస్తోంది. బాలీవుడ్ వర్గాల నుంచి అందుతున్న సమాచారం ప్రకారం.. ఈ చిత్రానికి అలియా అయితేనే సరిగ్గా సరిపోతుందని డైరెక్టర్ భావించాడట.

నాగ్ ఈ చిత్రాన్ని రాజమౌళి దర్శకత్వంలో వచ్చిన భారీ పాన్-ఇండియా చిత్రం ‘ఆర్‌ఆర్‌ఆర్’ స్థాయిలో తెరకెక్కిస్తారని అంటున్నారు. ‘ఆర్‌ఆర్‌ఆర్’ తర్వాత ఇది పూర్తి స్థాయి పాత్రతో అలియా మొదటి అవుట్‌అండ్‌అవుట్ పాన్ -ఇండియా చిత్రం అవుతుందని కూడా చెప్తున్నారు.

అయితే, ఇంకా పేరు పెట్టని ఈ ప్రాజెక్టు గురించి ఇప్పటికైతే అధికారికంగా మేకర్స్ ప్రకటించిందిలేదు. దీన్ని వైజయంతి ఫిల్మ్స్ నిర్మిస్తోందని, 2025 ద్వితీయార్ధంలో దీన్ని సెట్స్‌పైకి తీసుకెళ్లే అవకాశం ఉందని బాలీవుడ్ మీడియాలో ప్రచారం జరుగుతోంది. ఇక అలియా ప్రస్తుతం ‘ఆల్ఫా’ చిత్రీకరణలో బిజీగా ఉంది.