ఐటీ కంపెనీలో కొందరు స్నేహితుల మధ్య జరిగే సరదా సంఘటనలతో రూపుదిద్దుకుంది వేరే లెవెల్ ఆఫీస్’ వెబ్ సిరీస్. వినోదంతో పాటు రొమాన్స్, కుటుంబ భావోద్వేగాలు తదితర అంశాలతో సాఫ్ట్‌వేర్ ఉద్యోగుల లైఫ్‌స్టుల్‌కు కనెక్ట్ చేస్తూ ఈ సిరీస్‌లో సన్నివేశాలను చూపించనున్నారు. ఇ సత్తిబాబు దర్శకత్వంలో వరుణ్ ఎంటర్‌టైన్‌మెంట్స్ బ్యానర్‌పై వరుణ్ చౌదరి గోగినేని నిర్మిస్తున్నారు. ఆర్‌జే కాజల్, అఖిల్ సార్థక్, శుభశ్రీ, మిర్చి కిరణ్, రీతు చౌదరి, స్వాతి చౌదరి, వసంతిక, మహేశ్ విట్టా ప్రధాన పాత్రల్లో నటిస్తున్న ఈ సిరీస్ డిసెంబర్ 12 నుంచి ఆహా ఓటీటీ ఒరిజినల్స్‌గా స్ట్రీమింగ్‌కు రానుంది.

ఈ సందర్భంగా ఈ సిరీస్ ట్రైలర్‌ను సోమవారం హైదరాబాద్‌లో విడుదల చేశారు. ఈ ఈవెంట్‌లో నటీనటులు, సాంకేతిక బృందం, మేకర్స్ తమ అభిప్రాయాలను, అనుభవాలను పంచుకున్నారు. డైరెక్టర్ సత్తిబాబు మాట్లాడుతూ.. తమిళంలో వేరే మాదిరి ఆఫీస్’ వెబ్ సిరీస్ పెద్ద సక్సెస్ అయ్యింది. దాన్ని తెలుగులోకి తీసుకొచ్చే ప్రయత్నంలో ఆహా టీమ్ నన్ను అప్రోచ్ అయ్యారు. తెలుగు కోసం ఒరిజినల్ నుంచి 50 శాతం మార్పు చేశాం. మన దగ్గర ఉండే కార్పొరేట్ ఫ్యామిలీస్ అందరికీ ఈ సిరీస్ బాగా కనెక్ట్ అవుతుంది’ అని తెలిపారు. స్క్రిప్ట్ రైటర్ ఎన్ షణ్ముక్ శ్రీనివాస్, ప్రొడ్యూసర్ కపాచంద్, ఆహా కంటెంట్ హెడ్ వాసు, నటీనటులు, ఇతర సాంకేతిక బృందం ఈ కార్యక్రమంలో పాల్గొన్నారు.