ఇప్పటి వరకూ రాజమౌళిని కొట్టేవారు లేరు.. ఆయన తీసినటువంటి థీమ్‌తో సినిమా తీసేవాళ్లు లేరు అనుకున్నాం కదా. ఏదైనా పోటీ ఉంటే ఎదుటి వ్యక్తి శక్తేంటనేది మనకు మరింత స్పష్టంగా తెలస్తుంది. ఇప్పటి వరకూ రాజమౌళికి ఎవరూ ఎదురెళ్లే సాహసం చేయలేదు. కానీ ఇప్పుడు ఓ సినిమా లైన్.. రాజమౌళి లైన్‌ను పోలి ఉండటంతో దేశ వ్యాప్తంగా ఆ సినిమా చర్చనీయాంశంగా మారింది.

ఇప్పటి వరకూ ఒక్క సినిమా గురించే ఆసక్తిగా చర్చించుకున్న జనం ఇప్పుడు మరో సినిమా గురించి కూడా చర్చించుకోవడం మొదలు పెట్టారు. అదే ‘రేంజర్’. మహేశ్ బాబు కథానాయకుడిగా రాజమౌళి ‘ఎస్‌ఎస్‌ఎంబీ 29’ను తెరకెక్కించనున్నారు. ఈ సినిమా పాన్ వరల్డ్‌ను టచ్ చేసేలా ఉంటుందని ప్రేక్షకులు చెప్పుకుంటున్నారు. అయితే దానికంటే ముందు గానే బాలీవుడ్‌లో ఇలాంటి ప్రయోగమే ఒకటి జరుగుతోందట.

భారతీయ పురాణాలు, జానపద కథలతో కూడిన కంటెంట్‌తో యాక్షన్ అడ్వెంచర్ జానర్‌లో మూవీ రూపొందనుందట. జగన్ శక్తి దర్శకత్వంలో తెరకెక్కనున్న ఈ చిత్రంలో అజయ్ దేవగణ్ హీరోగా నటిస్తున్నారు. డిసెంబర్‌లో ఈ సినిమా పట్టాలెక్కుతుందట. ఈ చిత్రాన్ని బాలీవుడ్ హేమాహేమీలు ఇండియానా జోన్స్‌తో పోల్చుతున్నారు. ఈ సినిమా రాజమౌళి చిత్రానికి సమాంతరంగా ఉంటుందని చెబుతున్నారు. అంతేకాకుండా ‘ఎస్‌ఎస్‌ఎంబీ 29’ కంటే ముందుగానే ‘రేంజర్’ విడుదలవుతుందట. అప్పుడే పోలిక రెండు సినిమాల మధ్య ప్రారంభమైంది.