‘ఆయ్’, ‘మారుతీనగర్ సుబ్రమణ్యం’ చిత్రాల్లో నటించిన అంకిత్ కొయ్య మరో సరికొత్త కథాంశంతో ప్రేక్షకుల ముందుకు వస్తున్నాడు. డైరెక్టర్ శ్రీహర్ష సత్య ఆర్ట్స్ ఎంటర్‌టైన్‌మెంట్ బ్యానర్‌పై తెరకెక్కిస్తున్న ఈ చిత్రానికి సత్య కోమల్ నిర్మాత. ‘గ్యాంగ్ లీడర్’ ఫేమ్ శ్రియా కొంతం కథానాయికగా నటిస్తోంది. ఈ సినిమాకు మేకర్స్ ‘14 డేస్ గర్ల్‌ఫ్రెండ్ ఇంట్లో’ అనే టైటిల్‌ను ఖరారు చేశారు. టైటిల్ పోస్టర్‌తోపాటు వీడియోను సైతం విడుదల చేశారు.

అందులో శ్రియా కొంతంకు బాయ్‌ఫ్రెండ్‌గా అంకిత్ కొయ్య కనిపించాడు. హీరోయిన్ ఫ్యామిలీ, ఆ ఫ్యామిలీలో మెయిన్‌పర్సన్ కాకా అనే పాత్రలో వెన్నెల కిషోర్‌ను గమనించవచ్చు. మిగతా ప్రధాన పాత్రల్లో ఇంద్రజ, ప్రశాంత్ శర్మ, లక్ష్మీ సుజాత, అశోక్ చంద్ర, నేహా కృష్ణ తదితరులు నటించారు.

ఈ చిత్రానికి సంగీతం మార్క్ కే రూబిన్ సమకూరుస్తుండగా, కే సోమశేఖర్ సినిమాటోగ్రఫీ అందిస్తున్నారు. గమ్మత్తయిన టైటిల్‌తో ఆసక్తి రేకెత్తిస్తున్న ఈ సినిమాకు సంబంధించి మరిన్ని వివరాలు తెలియాలంటే మరికొన్ని రోజులు ఆగాల్సిందేనని అంటున్నారు మేకర్స్.