వివిధ భాషల్లో సినిమాలు చేస్తూ, దేశవ్యాప్తంగా తనకంటూ ప్రత్యేక గుర్తింపు సంపాదించుకున్నారు మలయాళ స్టార్ దుల్కర్ సల్మాన్. తెలుగులో ‘మహానటి’, ‘సీతారామం’ వంటి చిత్రాల్లో నటించిన ఆయన ‘లక్కీ భాస్కర్’ అనే మరో వైవిధ్యమైన సినిమాతో అలరించనున్నాడు. డైరెక్టర్ వెంకీ అట్లూరి దర్శకత్వం వహిస్తున్న ఈ చిత్రాన్ని సితార ఎంటర్‌టైన్‌మెంట్స్ నిర్మిస్తోంది. ఈ చిత్రాన్ని మొదట సెప్టెంబర్ 7న విడుదల చేయాలని భావించిన నిర్మాతలు దీపావళి పండుగ కానుకగా విడుదల చేయాలని తాజాగా నిర్ణయించారు. ‘లక్కీ భాస్కర్’ను అక్టోబర్ 31న థియేటర్లలోకి తీసుకురానున్నట్టు ప్రకటించారు. దుల్కర్ సల్మాన్ సరసన మీనాక్షి చౌదరి కథానాయికగా నటిస్తున్న ఈ చిత్రానికి సూర్యదేవర నాగవంశీ, సాయి సౌజన్య నిర్మాతలు.