బెంగళూరు: ఆటకు వీడ్కోలు పలికిన తర్వాత కొంత కాలం పాటు ఎవరికీ కనిపించనని విరాట్ కోహ్లీ వెల్లడించాడు. ప్రస్తుతం ఐపీఎల్లో అదరగొడుతూ.. అత్యధిక పరగుల వీరుల జాబితాలో అగ్రస్థానంలో ఉన్న విరాట్.. ఆ తర్వాత టీ20 ప్రపంచకప్ బరిలో దిగనున్నాడు. ఈ నేపథ్యంలో విరాట్ మాట్లాడుతూ.. ‘గతం గురించి ఆలోచిస్తూ ఎక్కువ బాధపడను. ఏదైనా మ్యాచ్‌లో మంచి ప్రదర్శన చేయలేకపోతే అదే తలుచుకుంటూ ఆగిపోను.. దాన్ని పక్కన పెట్టి ముందుకు సాగుతా. క్రీడాకారుడిగా.. ఏదో ఒక రోజు ఆటకు ముగింపు పలకాల్సిందే. ప్రతి దానికి ఒక సమయం అంటూ వస్తుంది. దాని గురించి ఆలోచించకుండా.. మనం చేయగలిగిన దానిపైనే దృష్టి పెట్టడం నాకు ఇష్టం. క్రికెట్‌కు రిటైర్మెంట్ ప్రకటించిన తర్వాత చాన్నాళ్లపాటు ఎవరికీ కనిపించను. సుదీర్ఘమైన విశ్రాంతి తీసుకుంటా. ఆ తర్వాత ఏం చేయాలని ఆలోచిస్తా. ఆడినంత కాలం అత్యుత్తమ ప్రదర్శన చేసేందుకే ఇష్టపడతా’ అని అన్నాడు. దీనికి సంబంధించిన వీడియోను బెంగళూరు ఫ్రాంచైజీ సోషల్ మీడియాలో పోస్ట్ చేయగా.. అభిమానులు సరదా వ్యాఖ్యలు చేస్తున్నారు.