రాహుల్ విజయ్, శివాని జంటగా నటిస్తున్న చిత్రం ‘విద్య వాసుల అహం’. మణికాంత్ గెల్లి దర్శకత్వంలో మహేష్ దత్తా, లక్ష్మీనవ్య ఈ చిత్రాన్ని నిర్మించారు. ఈ నెల 17నుంచి ఈ చిత్రం ఆహా ఓటీటీలో నేరుగా స్ట్రీమింగ్ కానుంది. కాగా ఈ చిత్రం ట్రైలర్ విడుదల కార్యక్రమం బుధవారం హైదరాబాద్‌లో జరిగింది. దర్శకుడు మాట్లాడుతూ ‘రాహుల్ విజయ్, శివాని, వీరిద్దరూ విద్య, వాసులుగా ఏ మాత్రం అహాన్ని తగ్గించుకోకుండా ఎలా తమ కొత్త కాపురాన్ని లీడ్ చేశారు? చివరికి ఈగోస్ నుండి ఎవరూ ఎలా బయటికొచ్చారు? అనే కథతో ఆసక్తికరంగా తెరకెక్కిన ఫ్యామిలీ ఎంటర్‌టైనర్ ఇది. ఈ వేసవికి అందరికి మంచి వినోదాన్ని పంచుతుంది. ఈ సినిమా కోసం మీరు థియేటర్స్‌కు వెళ్లే పని లేదు. ఎటువంటి అహం లేకుండా మేమే మీ ఇంటికి ‘ఆహా’ ద్వారా వస్తున్నాం. తప్పకుండా మా చిత్రాన్ని ఆదరిస్తారని నమ్ముతున్నాను’ అన్నారు. హీరో రాహుల్ విజయ్ మాట్లాడుతూ ‘ఇదొక చిన్న క్యూట్ ఈగోస్ వుండే ఫన్ ఫిలిం. సరదాగా ఈ వేసవిలో ఇంట్లో కూల్‌గాఎంజాయ్ చేసే సినిమా. ఫ్యామిలి సినిమా చేయాలనే నా కోరిక ఈ సినిమాతో నెరవేరింది’ అన్నారు. శివాని మాట్లాడుతూ ‘ గతంలో నేను నటించిన ‘కోట బొమ్మాళి’ కూడా ఆహాలోనే వచ్చి మంచి సక్సెస్ అయ్యింది. ఇప్పుడు విద్య, వాసుల అహం కూడా ఆహాలోనే వస్తుంది. నాకు నిజంగా ఆహా ఒక్క లక్కీ ఫ్లాట్‌ఫామ్‌లా నిలిచింది. రాహుల్‌తో నాకు మంచి అనుబంధం వుంది. మరోసారి అతనితో కలిసి నటించడం ఆనందంగా వుంది. తప్పకుండా ఈ చిత్రం ఇంటిల్లిపాదిని అలరిస్తుంది’ అన్నారు.