యంగ్ హీరో కిరణ్ అబ్బవరం నటిస్తున్న పీరియాడిక్ థ్రిల్లర్ సినిమా ‘క’. నయన్ సా రిక, తన్వీరామ్ హీరోయిన్లుగా నటిస్తున్నారు. దర్శక ద్వయం సుజీత్, సందీప్ గ్రామీణ నేపథ్యంలో సాగే యాక్షన్ థ్రిల్లర్ కథతో ఈ చిత్రాన్ని తెరకెక్కిస్తున్నారు. చింతా వరలక్ష్మి సమర్పణలో శ్రీచక్రాస్ ఎంటర్ టైన్‌మెంట్స్ బ్యానర్‌పై చింతా గోపాలకృష్ణరెడ్డి నిర్మిస్తున్న ఈ మూవీ నుంచి ఫస్ట్ సింగిల్‌గా ‘వరల్డ్ ఆఫ్ వాసుదేవ్..’ను మేకర్స్ విడుదల చేశారు. ‘ఏ మొదలు తుదలు లేని ప్రయాణం. ఏ అలుపూ సొలుపు లేని విహారం.

ఏ చెరలు తెరలు తెలియని పాదం.. ఈ మజిలీ ఒడిలో ఒదిగిన వైనం, నిన్న మొన్న ఉన్న నన్ను చూశారా.. వెన్నుదన్ను అంటూ ఏముంది. ఒంటరివాడినని అంటారా నాతో పాటు ఊరుంది...’ అంటూ హీరో వాసుదేవ్ పాత్రను ప్రతిబింబిస్తూ సాగుతున్న ఈ హీరో వాసుదేవ్ క్యారెక్టరైజేషన్‌ను ఆవిష్కరించిందీ పాట. సనాపతి భరద్వాజ పాత్రుడు లిరిక్స్ రాయగా, సామ్ సీఎస్ స్వరాలు సమకూర్చారు. ఈ గీతాన్ని కపిల్ కపిలన్ పాడారు. ఈ సినిమా త్వరలో తెలుగు, తమిళ, మలయాళ, కన్నడ భాషల్లో విడుదల చేయనున్నారు. ఈ సినిమాకు డీవోపీ: విశ్వాస్ డానియేల్, సతీశ్‌రెడ్డి మాసం.