హైదరాబాద్: కేంద్ర సహాయ మంత్రి బండి సంజయ్(Union Minister Bandi Sanjay ) తిరుమల తిరుపతి దేవస్థానం (టీటీడీ) చైర్మన్ బి.ఆర్. నాయుడుకు లేఖ రాశారు. కరీంనగర్‌లోని శ్రీ వెంకటేశ్వర స్వామి ఆలయ(Tirumala Tirupati Devasthanams) నిర్మాణాన్ని త్వరగా ప్రారంభించాలని ఆలయ ట్రస్ట్‌ను కోరారు. 2023 మే 31న కరీంనగర్‌లోని పద్మానగర్ ప్రాంతంలో టీటీడీ నిర్వహించే ఆలయ ప్రాజెక్టుకు జరిగిన శంకుస్థాపన కార్యక్రమాన్ని సంజయ్ తన లేఖలో గుర్తు చేసుకున్నారు. ఈ కార్యక్రమానికి భక్తులు, స్థానికులు ఉత్సాహంగా హాజరయ్యారు. అయితే, అప్పటి నుండి క్షేత్రస్థాయిలో ఎటువంటి స్పష్టమైన పురోగతి సాధించకపోవడం పట్ల ఆయన నిరాశ వ్యక్తం చేశారు. రెండేళ్ల నుంచి ఒక్క అడుగు కూడా ముందుకు పడలేదని తెలిపారు. టీటీడీ ఆలయ నిర్మాణం కోసం ప్రజలు ఎదురు చూస్తున్నారని బండి సంజయ్ స్పష్టం చేశారు.

"భూమి పూజతో శుభప్రదంగా ప్రారంభమైనప్పటికీ, ఆలయ నిర్మాణం ఒక్క అడుగు కూడా ముందుకు సాగకపోవడం దురదృష్టకరం" అని సంజయ్ తన లేఖలో పేర్కొన్నారు. వెంకటేశ్వర భక్తులు, కరీంనగర్ ప్రాంత ప్రజల హృదయపూర్వక ఆకాంక్షలను ప్రతిబింబిస్తూ, ఈ ప్రాజెక్టుకు ప్రాధాన్యత ఇవ్వాలని బండి సంజయ్ టీటీడీ చైర్మన్‌కు విజ్ఞప్తి చేశారు. కరీంనగర్‌కు ఆధ్యాత్మిక శక్తిని తీసుకురావడానికి ఆలయం సామర్థ్యాన్ని ఆయన నొక్కి చెప్పారు.  మరింత ఆలస్యం చేయకుండా నిర్మాణ పనులను వేగవంతం చేయాలని టీటీడీని కోరారు.