1. మరో వ్యక్తికి తీవ్ర గాయాలు
2. చికిత్స పొందుతూ డ్రైవర్ సైతం మృతి

మానకొండూర్, నవంబర్ 15 (విజయక్రాంతి): రోడ్డు పక్కన నడుచుకుంటూ వెళ్తున్న వ్యక్తులను కారు ఢీకొట్టిన ఘటనలో ఇద్దరు అక్కడికక్కడే మృతిచెందగా, మరో పాదచారి గాయపడ్డాడు. ఇదే ఘటనలో గాయపడిన డ్రైవర్ సైతం చికిత్స పొందుతూ ఆసుపత్రిలో మృతిచెందాడు. ఘటన తిమ్మాపూర్ మండలంలో చోటుచేసుకున్నది.

తెలిసిన వివరాల ప్రకారం.. తిమ్మాపూర్ మండలం కొత్తపల్లిలోని ఓ రైస్ మిల్లులో బీహార్‌కు చెందిన ముగ్గురు వ్యక్తులు పనిచేస్తున్నారు. వీరు శుక్రవారం రాత్రి టీ తాగేందుకు మిల్లు బయటకు వచ్చారు. టీ తాగి రోడ్డు పక్కన నడుచుకుంటూ వెళ్తుండగా హైదరాబాద్ వైపు వెళ్తున్న కారు ఢీకొట్టింది. ఘటనలో తీవ్ర గాయాల పాలై  ఇద్దరు వ్యక్తులు అక్కడికక్కడే మృతిచెందగా, మరో వ్యక్తికి తీవ్ర గాయాలయ్యాయి.

కారు నడుపుతున్న వెంకట్‌రెడ్డికి గాయాలయ్యాయి. క్షతగాత్రులను స్థానికులు కరీంనగర్ ప్రభుత్వాసుపత్రి తరలించారు. అక్కడి చికిత్స పొందుతూ వెంకట్‌రెడ్డి మృతిచెందాడు. మరో పాదచారి చికిత్స పొందుతున్నారు. ప్రమాదంపై పోలీసులు కేసు నమోదు చేసి విచారిస్తున్నారు.