కరీంనగర్ (విజయక్రాంతి): జగిత్యాల శివార్లలో జరిగిన రోడ్డు ప్రమాదం జగిత్యాల పట్టణంలో విషాదాన్ని నింపింది. ఆదివారం తెల్లవారుజామున కరీంనగర్-జగిత్యాల రహదారిలోని ధరూర్ సమీపంలో రోడ్డు ప్రమాదం జరిగింది. జగిత్యాల డిపోకు చెందిన సూపర్ లగ్జరీ బస్సు కారును ఢీకొట్టడంతో కారులో ఉన్న ఇద్దరు అక్కడికక్కడే మృతి చెందారు. కారులో నలుగురు ప్రయాణిస్తుండగా డ్రైవింగ్ చేస్తున్న సంకీర్త్ అనే యువకుడు, అతనితో పాటు ముందు సీట్లో ప్రయాణిస్తున్న యువతి మృత్యువాత పడ్డారు. వెనుక సీట్లో కూర్చున్న రాయమల్లు, ఆయన భార్యకు తీవ్ర గాయాలు కాగా ఆసుపత్రికి తరలించి చికిత్స అందిస్తున్నారు. సంకీర్త్ ఆయన తల్లిదండ్రులతో కలిసి జనగామకు పెళ్లికి హాజరై తిరిగి వస్తుండగా ఈ ప్రమాదం జరిగింది. మృతి చెందిన యువతి వారి బంధువుల అమ్మాయని తెలుస్తోంది. ఆర్టీసీ బస్సు ముందు టైరు ఊడిపోయి ఉండడంతో ప్రమాదం ఎలా జరిగింది అన్న విషయంపై ఆరా తీస్తున్నారు. యాక్సెల్ రాడ్ విరగిందా లేక టైరు ఊడిపోవడం వల్ల ప్రమాదం సంభవించిందా అన్న విషయంపై కూడా తెలుసుకుంటున్నారు.