హైదరాబాద్: తెలంగాణ యాంటీ-నార్కోటిక్స్ బ్యూరో, జూబ్లీహిల్స్(Jubilee Hills) పోలీసులతో కలిసి స్టింగ్ ఆపరేషన్ నిర్వహించి, మైనర్ అబ్బాయిలకు సిగరెట్లు అమ్ముతున్న ఇద్దరు వ్యక్తులను పట్టుకుంది. సిగరెట్లు కొనుగోలు చేస్తున్న మైనర్లను కూడా అదుపులోకి తీసుకున్నారు. జూబ్లీహిల్స్‌లోని రెండు కిరాణా దుకాణాలపై నార్కోటిక్స్ బ్యూరో నిఘా ఉంచింది. దుకాణ యజమానులు మైనర్ అబ్బాయిలకు(Minor boys) సిగరెట్లు అమ్ముతున్నట్లు గమనించింది.

రహస్య కెమెరాలను ఉపయోగించి కార్యకలాపాలను రికార్డ్ చేసిన బృందం, దుకాణ యజమానులు గంధం ప్రమీల (48), కె. వెంకటేశ్వరరావు (55) లను అదుపులోకి తీసుకుంది. ఇద్దరినీ జూబ్లీహిల్స్ పోలీసులకు అప్పగించారు. దుకాణ యజమానులపై COTPA(Cigarettes and Other Tobacco Products Act) చట్టం, జువెనైల్ జస్టిస్ చట్టం సెక్షన్ల కింద కేసు నమోదు చేశారు. ఇద్దరు బాలురలో ఒకరు పదవ తరగతి చదువుతుండగా, మరొకరు ఇంటర్మీడియట్ మొదటి సంవత్సరం చదువుతున్నారు, వారి తల్లిదండ్రుల సమక్షంలో కౌన్సెలింగ్ ఇచ్చి వదిలిపెట్టారు.