1. ప్రపంచ పారిశ్రామికవేత్తలు భారత్ వైపు చూస్తారు
2. ఈ అవకాశాన్ని మనకు అనుకూలంగా మలుచుకోవాలి 
3. తెలంగాణలో పెట్టుబడులు పెట్టేలా ప్రోత్సహించాలి
4. లాటిన్ అమెరికా, కరేబియన్ దేశాల ప్రతినిధులతో మంత్రి శ్రీధర్‌బాబు 

హైదరాబాద్, ఏప్రిల్ 5 (విజయక్రాంతి): వివిధ దేశాల ఉత్పత్తులపై సుంకాలను విధిస్తూ అమెరికా అధ్యక్షుడు డొనాల్డ్ ట్రంప్ తీసుకున్న నిర్ణయం ఒక రకంగా మన దేశానికి మేలే చేస్తుందని ఐటీ, పరిశ్రమల శాఖమంత్రి దుద్దిళ్ల శ్రీధర్‌బాబు పేర్కొన్నారు. దీని వల్ల పెట్టుబడులు పెట్టాలనుకొనే ప్రపంచస్థాయి పారిశ్రామికవేత్తలు భారత్ వైపు చూస్తారని..

ఈ పరిణామాన్ని అనుకూలంగా మలుచుకొని మరిన్ని పెట్టుబడులను ఆకర్షించేందుకు రాష్ట్ర ప్రభుత్వం కృషి చేస్తుందన్నారు. గ్లోబల్ ఇండియా బిజినెస్ ఫోరం (జీఐబీఎఫ్) ఆధ్వర్యంలో పార్క్ హయత్‌లో శనివారం నిర్వహించిన ‘ఇండియా  లాటిన్ అమెరికా, కరీబియన్ కంట్రీస్ బిజినెస్ కాంక్లేవ్’ రెండో ఎడిషన్‌కు మంత్రి శ్రీధర్‌బాబు ముఖ్యఅతిథిగా హాజరై మాట్లాడారు.

పరిశ్రమల ఏర్పాటుకు తెలంగాణలో ఉన్న అనుకూలతలను వివరించి, ఇక్కడ పెట్టుబడులు పెట్టేలా పారిశ్రామికవేత్తలను ప్రోత్సహించాలని లాటిన్ అమెరికా, కరేబియన్ దేశాల అధికార ప్రతినిధులను ఐటీ, పరిశ్రమల శాఖమంత్రి శ్రీధర్‌బాబు కోరారు. రాష్ట్రంలో పెట్టుబడులు పెట్టేందుకు ముం దుకొచ్చే పారిశ్రామికవేత్తలకు తమ ప్రభు త్వం అన్నిరకాలుగా అండగా ఉంటుందని స్పష్టం చేశారు.

ఆగ్రో ప్రాసెసింగ్ రంగాన్ని ప్రోత్సహించి అన్నదాతలను వ్యాపారవేత్తలుగా తీర్చిదిద్దుతామని తెలిపారు. రాష్ట్రంలో పరిశ్రమల ఏర్పాటుకున్న అనుకూలతలు, ప్రభుత్వం తరఫున పారిశ్రామికవేత్తలకు అందించే ప్రోత్సాహకాలను వివరించారు.

తెలంగాణలో ఎంఎస్‌ఎంఈలు ప్రపంచవ్యాప్తంగా సత్తాచాటేలా ప్రత్యేక పాలసీని తీసుకొచ్చామని ఆయన వెల్లడించారు. రాబోయే రోజుల్లో దేశ ఆర్థిక వ్యవస్థలో తెలంగాణ కీలక పాత్ర పోషిస్తుందని ఆశాభావం వ్యక్తం చేశారు. జహీరాబాద్ నిమ్జ్‌లో పెట్టుబడులు పెట్టేందుకు 6 అంతర్జాతీయ స్థాయి సంస్థలు  

ముందుకు వచ్చాయని, వీటిలో మూడు కొరియా కంపెనీలున్నాయని పేర్కొన్నారు. రాష్ట్రంలో ద్వితీ య, తృతీయ శ్రేణి నగరాలు, పట్టణాల్లో పరిశ్రమలు నెలకొల్పేలా పారిశ్రామికవేత్తలను ప్రోత్సహిస్తున్న ట్టు మంత్రి తెలిపారు. లాటిన్ అమెరికా, కరీబియన్ దేశాలకు, మనకు మధ్య అనేక సారూప్యతలున్నాయని తెలిపారు.

ఆయా దేశాలతో కలసి పనిచేసేందుకు రాష్ట్ర ప్రభుత్వం సిద్ధంగా ఉందని, ఇందుకు ముందుకు రావాలని ఆహ్వానించారు. కార్యక్రమంలో జీఐబీఎఫ్ ప్రతినిధులు జోషి, చక్రవర్తి, డాక్టర్ సీతారాం తదితరులు పాల్గొన్నారు.