మహిళా కూలీ దుర్మరణం

నల్లగొండ, నవంబర్ 10 (విజయక్రాంతి): అతివేగంగా వెళ్తున్న ట్రావెల్స్ బస్సు అదుపుతప్పి ట్రాక్టర్‌ను ఢీకొనడంతో మహిళా కూలీ మృతిచెందింది. నల్లగొండ జిల్లా దామరచర్ల మండలం వాడపల్లి చెక్‌పోస్టు సమీపంలో ఆదివారం ఈ దుర్ఘటన జరిగింది. దామరచర్ల నుంచి తెల్లవారుజామున నలుగురు  కూలీలతో ఇటుకల లోడ్‌తో ట్రాక్టర్ ఏపీలోని దాచేపల్లికి బయలుదేరింది.

వాడపల్లి చెక్‌పోస్టు వద్దకు రాగానే వెనుక నుంచి వేగంగా వచ్చిన ప్రైవేట్ ట్రావెల్స్ బస్సు ఢీకొట్టింది. దీంతో ట్రాక్టర్‌పై కూర్చున్న బొత్తలపాలేనికి చెందిన మహిళా కూలీ విమలమ్మ మృతిచెందింది. ట్రాక్టర్ డ్రైవర్ అఖిల్, పోలేపల్లి బంగారమ్మ, నందిపాటి ఎల్లమ్మకు తీవ్ర గాయాలమయ్యాయి. పోలీసులు ఘటనా స్థలానికి చేరుకొని క్షతగాత్రులను చికిత్స నిమిత్తం మిర్యాలగూడ ఏరియా దవాఖానకు తరలించారు. డ్రైవర్ నిద్రమత్తులో బస్సును నడుపడంతోనే ప్రమాదం జరిగిందని పోలీసులు తెలిపారు.