హైదరాబాద్: మూడవ రైల్వే లైన్ నిర్మాణం జరుగుతున్నందున మహబూబాబాద్ రైల్వే స్టేషన్(Mahabubabad railway station) గుండా వెళ్ళే అనేక రైళ్లను రద్దు చేస్తున్నట్లు రైల్వే అధికారులు ప్రకటించారు. ఈ రద్దులు నేటి నుండి మార్చి 13 వరకు అమలులో ఉంటాయి. ఖమ్మం రైల్వే చీఫ్ కమర్షియల్ ఇన్స్పెక్టర్ ఎం.డి. జాఫర్ ఈ సమాచారాన్ని అందిస్తూ, ప్రయాణికులు మార్పులను గమనించి సహకరించాలని కోరారు. గుంటూరు- కాజీపేట రైల్వే స్టేషన్ల(Guntur To Kazipet railway station) మధ్య నడుస్తున్న అనేక రైళ్లను పాక్షికంగా రద్దు చేయగా, మరికొన్నింటిని దారి మళ్లించారు.

దారి మళ్లించిన రైళ్లలో విశాఖపట్నం–న్యూఢిల్లీ, విశాఖపట్నం–గాంధీధామ్, హైదరాబాద్–షాలిమార్, ముంబై–భువనేశ్వర్, షిర్డీ–కాకినాడ, షిర్డీ–మచిలీపట్నం, ఎర్నాకుళం–బరౌని ఉన్నాయి. రద్దు చేయబడిన రైళ్లలో డోర్నకల్–విజయవాడ, విజయవాడ–భద్రాచలం రోడ్, గుంటూరు–సికింద్రాబాద్, విజయవాడ–సికింద్రాబాద్, తిరుపతి–సికింద్రాబాద్, ఇండోర్–కొచువేలి, కోర్బా–తిరువనంతపురం, గోరఖ్‌పూర్–కొచువేలి, హిసార్–తిరుపతి ఉన్నాయి. అదనంగా, గుంటూరు-సికింద్రాబాద్, సికింద్రాబాద్-గుంటూరు రైళ్లు రేపటి నుండి మార్చి 13 వరకు రద్దు చేయబడతాయి. ఈ రైళ్లలో కొన్ని తిరుగు ప్రయాణాలపై ప్రభావం పడుతుందని రైల్వే అధికారులు స్పష్టం చేశారు. అత్యవసర ప్రయాణ సమాచారం అవసరమైన ప్రయాణికులు ఖమ్మం రైల్వే స్టేషన్‌ను సంప్రదించాలని సూచించారు.