హైదరాబాద్ సిటీబ్యూరో, మే16 (విజయక్రాంతి) : ఇంకుడు గుంతల నిర్మాణంపై పలువురు నగర వాసులు, ప్లంబర్లకు ఒకరోజు శిక్షణ ఇచ్చినట్లు జల మండలి ప్రత్యేకాధికారి జ్వాలా సత్యనారాయణ తెలిపారు. గురువారం జూబ్లీహిల్స్‌లోని రెయిన్ వాటర్ హార్వెస్టింగ్ థీమ్‌పార్క్‌లో నిర్వహించిన ఈ శిక్షణ కార్యక్రమంలో 30 మంది పాల్గొన్నారు. వారికి జలమండలి అధికారులు శిక్షణ ఇచ్చారు. ఈ సందర్భంగా ప్రత్యేకాధికారి సత్యనారాయణ మాట్లాడుతూ.. జలమండలి, జీహెచ్‌ఎంసీ, హెచ్‌ఎండీఏ, సీడీఎంఏ ఆధ్వర్యంలో ఇంకుడు గుంతల నిర్మాణంపై శిక్షణ ఇస్తున్నామని తెలిపారు. ఏప్రిల్‌లో కూడా 3 రోజుల పాటు శిక్షణ ఇచ్చామని, వారంతా పలు ప్రాంతాల్లో అవగాహన కార్యక్రమాలు నిర్వహిస్తున్నట్లు పేర్కొన్నారు. తాము పనికి వెళ్లిన చోట ఇంకుడు గుంతలు లేకపోతే ముందుగా వాటి గురించి అవగాహన కల్పించాకే పనులు ప్రారంభిస్తామని ప్లంబర్లు ప్రతిజ్ఞ చేశారు.