సదరు పోలీస్ అధికారిపై వేటు 

హైదరాబాద్ సిటీబ్యూరో, జూలై 18 (విజయక్రాంతి): నో పార్కింగ్ ప్రదేశంలో లారీ ఆపిన డ్రైవర్‌పై ఓ ట్రాఫిక్ ఎస్సై బూతుపురాణం ఎత్తుకున్నాడు. అక్కడితో అగకుండా డ్రైవర్‌పై చేయిచేసుకున్నాడు. అజ్ఞాత వ్యక్తి తన మొబైల్‌లో వీడియోను చిత్రీకరించి సోషల్ మీడియాలో పెట్టడంతో అది కాస్తా వైరల్ అయింది. తెలిసిన వివరాల ప్రకారం.. జీడిమెట్ల ట్రాఫిక్ పోలీసులు బుధవారం గండిమైసమ్మ నర్సాపూర్ మార్గంలో విధు లు నిర్వర్తిస్తున్నారు. ఈక్రమంలో అటుగా వస్తున్న లారీ ట్రాఫిక్ రద్దీ కారణంగా నో పార్కింగ్ ప్రదేశంలో ఆగింది.

దీంతో కోపంతో ఊగిపోతూ జీడిమెట్ల ట్రాఫిక్ ఎస్సై యాదగిరి లారీ వద్దకు వెళ్లాడు. డ్రైవర్‌ను దూషిస్తూ చెంప చెల్లుమనిపించాడు. బాధితుడు వెంటనే డ్రైవర్ల సంఘం నాయకులకు కాల్ చేశాడు. వారంతా వెంటనే ట్రాఫిక్ పోలీస్‌స్టేషన్ చేరుకుని బైఠాయించి ధర్నా చేపట్టారు. మరోవైపు మాజీ మంత్రి కేటీఆర్ సోషల్ మీడియా వేదికగా సదరు ట్రాఫిక్ ఎస్సైపై చర్యలు తీసుకోవాలని ప్రభుత్వాన్ని డిమాండ్ చేశారు. పోలీస్‌శాఖ వెంటనే స్పందించి ట్రాఫిక్ ఎస్సైని బదిలీ చేస్తూ ఉత్తర్వులు జారీ చేసింది.