దక్షిణాది సినీ పురస్కారాల్లో సైమా అవార్డులు ఎంతో ప్రతిష్టాత్మకం. సైమా 2024 అవార్డుల ప్రదానోత్సవం శనివారం రాత్రి దుబాయ్‌లో అట్టహాసంగా జరిగింది. 2023కిగాను ప్రకటించిన అవార్డులను ప్రదానం చేసిన ఈ వేదికపై దక్షిణాది నటీనటులు సందడి చేశారు. హీరోలు విజయ్ దేవరకొండ, రానా దగ్గుబాటి, నిర్మాతలు అల్లు అరవింద్, టీజీ విశ్వప్రసాద్ అతిథులుగా పాల్గొన్నారు. పలువురు హీరోహీరోయిన్లు ప్రత్యేక ప్రదర్శనలతో ఆకట్టుకున్నారు. ఈ వేడుకల్లో తెలుగు చిత్రాలు సత్తా చాటాయి. నేచురల్ స్టార్ నాని సినిమాల హవా కొనసాగింది.

దసరా, హాయ్ నాన్న చిత్రాలు అవార్డులు కొల్లగొట్టాయి. ‘దసరా’, ‘బేబి’ సినిమాలు ఏకంగా నాలుగేసి పురస్కారాలు దక్కించుకున్నాయి. ‘దసరా’లో నటనకు ఉత్తమ నటుడిగా నాని, ఉత్తమ నటిగా కీర్తి సురేశ్, ఉత్తమ దర్శకుడు (డెబ్యూ)గా శ్రీకాంత్ ఓదెల అవార్డులు అందుకున్నారు. ఉత్తమ డెబ్యూ నటిగా వైష్ణవి చైతన్యకు అవార్డు దక్కింది. ఉత్తమ చిత్రంగా ‘భగవంత్ కేసరి’ నిలిచింది. సెన్సేషన్ ఆఫ్ ది ఇయర్ అవార్డును డైరెక్టర్ సందీప్ రెడ్డి వంగా అందుకున్నారు. ఉత్తమ సంగీత దర్శకుడిగా హేషామ్ అబ్దుల్ వాహబ్ (హాయ్ నాన్న) అవార్డు పొందారు. సైమా చైర్‌పర్సన్స్ విష్ణువర్ధన్, ప్రసాద్ అడుసుమిల్లి పాల్గొన్నారు.