వరుస విజయాలతో దూసుకుపోతున్న నందమూరి బాలకృష్ణ ప్రస్తుతం తన 109వ చిత్రం కోసం పనిచేస్తున్నారు. వర్కింగ్ టైటిల్ ‘ఎన్‌బీకే109’గా ప్రచారంలో ఉన్న ఈ సినిమాలో బాలీవుడ్ నటుడు బాబీ డియోల్ కీలక పాత్ర పోషిస్తున్నారు. దర్శకుడు బాబీ కొల్లి తెరకెక్కిస్తున్న ఈ చిత్రాన్ని సితార ఎంటర్‌టైన్‌మెంట్స్, ఫార్చ్యూన్‌ఫోర్ సినిమాస్ పతాకాలపై సూర్యదేవర నాగవంశీ, సాయి సౌజన్య నిర్మిస్తున్నారు.

ప్రస్తుతం చిత్రీకరణ చివరి దశలో ఉన్న ఈ మూవీ ప్రచార చిత్రాలు, రెండు భారీ యాక్షన్ గ్లింప్స్ ఇప్పటికే అంచనాలను రెట్టింపు చేశాయి. తాజాగా చిత్ర టైటిల్ టీజర్ రిలీజ్‌కు ముహూర్తం ఖరారైంది. టైటిల్ టీజర్ విడుదల తేదీని నిర్మాతలు మంగళవారం ప్రకటించారు. కార్తీక పౌర్ణమి సందర్భంగా నవంబర్ 15న టైటిల్ టీజర్‌ను విడుదల చేయనున్నట్టు వెల్లడించారు.

టైటిల్ టీజర్ అనౌన్స్‌మెంట్ పోస్టర్‌లో విభిన్న దుస్తులు ధరించి, ప్రత్యేకంగా రూపొందించిన ఆయుధాలను చేతబట్టిన బాలకృష్ణ లుక్ ఆకట్టుకుంటోంది. 2025 సంక్రాంతి కానుకగా ప్రపంచవ్యాప్తంగా విడుదల కానున్న ఈ చిత్రానికి డీవోపీ: విజయ్ కార్తీక్ కన్నన్; సంగీతం: ఎస్ థమన్.