నేను నటించిన సినిమా దీపావళికి విడుదలవటం ఇదే మొదటిసారి.. అంటూ ఎంతో తన్మయత్వానికి గురయింది హీరోయిన్ రుక్మిణి వసంత్. శ్రీమురళి హీరోగా నటిస్తున్న ‘బఘీర’లో రుక్మిణి వసంత్ కథానాయకి. డాక్టర్ సూరి దర్శకత్వంలో విజయ్ కిరగందూర్ నిర్మిస్తున్న ఈ సినిమా అక్టోబర్ 31న విడుదల కానుంది. ఈ సందర్భంగా రుక్మిణి వసంత్ బుధవారం విలేకరులతో ప్రత్యేకంగా సమావేశమై సినిమా విశేషాలను పంచుకుంది.

“సప్త సాగరాలు దాటి’ తర్వాత నాకు చాలా ప్రభావవంతమైన పాత్రలు రావడం మొదలైంది. అవి నేను చేయగలనన్న నమ్మకం ఫిల్మ్ మేకర్స్‌లో ఉంచడం నా అదృష్టం. ‘బఘీర’లో నా క్యారెక్ట ర్‌కు చాలా ప్రాధాన్యముంది. నా పాత్ర పేరు స్నేహ. తను ఓ డాక్టర్. భావోద్వేగ సన్నివేశాల్లో నా నటన చాలా అద్భుతంగా వచ్చింది. నేను నటించిన సినిమా దీపావళికి విడుదలవటం ఇదే మొదటిసారి. చాలా ఎక్సైటింగ్‌గా ఉంది. ఈ సినిమాలో నా క్యారెక్టర్‌ను దీపంతో పోల్చవచ్చు” అని తెలిపారు.