వెన్నెల కిషోర్ టైటిల్ రోల్ పోషిస్తున్న చిత్రం ‘శ్రీకాకుళం షెర్లాక్ హోమ్స్’. ఈ క్రైమ్ థ్రిల్లర్‌కు రైటర్ మోహన్ రచన, దర్శకత్వం వహిస్తున్నారు. వెన్నపూస రమణా రెడ్డి నిర్మిస్తున్నారు. అనన్య నాగళ్ల, సీయా గౌతమ్ కథానాయికలుగా నటిస్తున్న ఈ సినిమా డిసెంబర్ 25న క్రిస్మస్ కానుకగా విడుదల కానుంది. ఈ నేపథ్యంలో మేకర్స్ గురువారం హైదరాబాద్ లో మూవీ టీజర్ లాంచ్ ఈవెంట్ నిర్వహించా రు. ఈ కార్యక్రమానికి ముఖ్య అతిథిగా విచ్చేసిన దర్శకుడు యదు వంశీ మాట్లాడుతూ..

‘ప్రేక్షకులు  కంటెంట్ ఉంటే చిన్న సినిమాకూ చాలా పెద్ద విజయాన్ని అందిస్తున్నారు. ‘శ్రీకాకుళం షెర్లాక్ హోమ్స్’ టైటిల్ చాలా ఇంట్రెస్టింగ్‌గా ఉంది. చంటబ్బాయి తాలూకా అనే ట్యాగ్ పెట్టడం చాలా ఆసక్తికరంగా ఉంది’ అన్నారు. మరో అతిథి వంశీ నందిపాటి మాట్లాడుతూ.. ‘రెండు నెలల క్రితం ఈ సినిమా చూస్తూ ఆద్యంతం మెస్మరైజ్ అయ్యాను. డైరెక్టర్ ఇరగదీసేశాడు అనిపించింది. చిన్న సినిమా పెద్ద సినిమా అని ఏమీ ఉండదు. అంతా కంటెంట్ మీదే ఆధారపడి ఉంటుంది’ అని చెప్పారు.

అనన్య నాగళ్ల మాట్లాడుతూ.. ‘ఈ సినిమా ఒక ఫుల్ మీల్స్ లాంటిదే. అలా మా డైరెక్టర్ ఈ సినిమాను డిజైన్ చేశారు. ఇందులో నాకు చాలా మంచి రోల్ ఉంది’ అని తెలిపారు. చిత్ర దర్శకుడు మోహన్ మాట్లాడుతూ.. ‘వంశీ గారు కంటెంట్ ఉంటేనే తీసుకుంటారు. ఆయన సినిమా తీసుకొని మాకు ఇచ్చిన గైడెన్స్, చెప్పిన మార్పులు మాకు చాలా కాన్ఫిడెన్స్ ఇచ్చాయి’ అన్నారు. ఇంకా కార్యక్రమంలో యాక్టర్ రవితేజ మహాదాస్యం, ఆర్ట్ డైరెక్టర్ సురేశ్‌తోపాటు మిగతా చిత్రబృందం పాల్గొన్నారు.