నవీన్‌చంద్ర హీరోగా నటించిన చిత్రం ‘28డిగ్రీ సెల్సియస్’. ఈ ఎమోషనల్ థ్రిల్లర్ లవ్‌స్టోరీని ‘పొలిమేర’ ఫేమ్ డైరెక్టర్ డాక్టర్ అనిల్ విశ్వనాథ్ దర్శకత్వం లో వీరాంజనేయ ప్రొడక్షన్స్ బ్యానర్‌పై సాయిఅభిషేక్  నిర్మిస్తున్నారు. షాలినీ వడ్నికట్టి కథానాయిక. ఏప్రిల్ 4న థియేటర్ల ద్వారా ప్రేక్షకుల ముందుకొస్తోందీ సిని మా. ఈ సందర్భంగా హీరో నవీన్‌చంద్ర చిత్ర విశేషాలను విలేకరులతో పంచుకున్నారు.

“ఆరేళ్ల క్రితం డైరెక్టర్ అనిల్ విశ్వనాథ్ చెప్పిన కథ చాలా యూనిక్‌గా అనిపించింది. 28 డిగ్రీల టెంపరేచర్‌లో తన జీవిత భాగస్వామిని కాపాడుకునే వ్యక్తి కథ ఇది.  మెడికల్ కాలేజ్ స్టూడెంట్స్ అయిన కార్తీక్, అంజలి ప్రేమ పెళ్లి చేసుకుంటారు. డాక్టర్లుగా స్థిరపడతారు. అనారోగ్య సమస్య వల్ల అంజలిని 28 డిగ్రీ టెంపరేచర్‌లోనే చూసుకోవాలి. ఇలా నిజంగా ఎవరికీ జరగదు.

పుస్తకాల్లో ఉన్న ఒక థియరీని తీసుకుని దాన్ని సినిమా టిక్‌గా మలిచారు మా డైరెక్టర్. డాక్టర్ కాబట్టి అనిల్ విశ్వనాథ్ సినిమాలో మెడికల్ టర్మ్స్ చాలా వివరంగా రాశారు. ఈ సినిమా రెండు ప్రాంతాల్లో జరుగుతుంది. ఒకటి వైజాగ్, రెండోది జార్జియా. ఫస్ట్ అమెరికా అనుకున్నాం కానీ, అప్పుడు విదేశీ నటీనటులకు ప్రవేశం కష్టంగా ఉండేది. జార్జియాలో చిత్రీకరణ జరిపే క్రమంలో చాలా సమస్యలు ఎదుర్కొన్నాం.

ఏ హీరోకైనా సక్సెస్, ఒక మార్కెట్ ఉండాలి. అవి లేకపోతే మాత్రం ఆయన సినిమాల రిలీజ్‌లకు ఇబ్బందులు తప్పవు. ఈ చిత్రం పూర్తయిన సమయంలో నా సినిమాలు కొన్ని ఆడకపోవడం వల్ల ఈ చిత్రానికి బిజినెస్ జరగలేదు. అప్పటికి థ్రిల్లర్ జానర్ సినిమాలు ఇంతగా లేవు. ఇది లవ్ అండ్ థ్రిల్లర్ కాబట్టి సినిమా ఎవరికి చూపించినా కొన్ని మార్పులు చెప్తూ, డైరెక్టర్‌ను చాలా ఇబ్బందిపెట్టారు.

ఓటీటీల్లో కూడా సరైన ఆఫర్స్ రాలేదు. మరోవైపు మా డైరెక్టర్ అనిల్, ప్రొడ్యూసర్ సాయి అభిషేక్‌లు ఈ సినిమాను థియేటర్లలోనే విడుదల చేయాలన్న పట్టుదలతో ఉన్నారు. ‘పొలిమేర’ సక్సెస్ తర్వాత వంశీ నందిపాటి ఈ చిత్రం చూసి ఇంత మంచి ఎమోషన్, డ్రామా ఉన్న సినిమాను ఎందుకు రిలీజ్ చేయలేదు, నేను రిలీజ్ చేస్తా అని ముందుకొచ్చారు. ఈ సినిమా థియేటర్‌లోనే కాదు రేపు టీవీ, ఓటీటీ ఏ ప్లాట్‌ఫాంలో రిలీజైనా ప్రేక్షకులు ఆదరిస్తారనే నమ్మకం ఉంది.

నామటుకు ఎంత బాగా పర్‌ఫార్మ్ చేయాలో అంత చేశా. కోవిడ్ తర్వాత థ్రిల్లర్స్, యాక్షన్ మూవీస్ ఎక్కువయ్యాయి. సినిమాల్లో హింస పెరిగింది. సొసైటీలో కూడా హింస పెరిగింది. సినిమాల్లోనూ అలాంటి క్రైమ్స్ చూసేందుకు ప్రేక్షకులు ఆసక్తి చూపిస్తున్నారు. నేను హీరోగా చేసే సినిమాలకు ప్రొడక్షన్ వైపు బలంగా ఉన్నారా.. లేదా? అని చూసుకుంటున్నా. నా క్రాఫ్ట్‌ను, కెరీర్‌ను, లైఫ్‌ను బ్యాలెన్స్ చేసుకుంటూ క్యారెక్టర్స్ చేస్తున్నా.

‘అరవింద సమేత’, ‘వీర రాఘవ’లో నేను చేసిన పాత్ర లకు చాలా మంచి పేరొచ్చింది. నా కెరీర్‌కు టర్నింగ్ పాయింట్ అయ్యింది. ఇప్పుడు అదే బ్యానర్‌లో రవితేజ హీరోగా నటిస్తున్న ‘మాస్ జాతర’ చిత్రంలో ఓ సరికొత్త పాత్రలో నన్ను చూస్తారు.

నేను ‘గేమ్‌ఛేంజర్’లో ఉండిపోవడం వల్ల సూర్య రెట్రో సినిమాలో మెయిన్ విలన్‌గా నటించే అవకాశం కోల్పోయాను. ఇప్పుడు ఏకే ఎంటర్‌టైన్‌మెంట్స్‌లో ‘షో టైమ్’ చిత్రంతోపాటు ‘11’ అనే మరో సినిమా ఉంది. నాకు బాగా పేరు తెచ్చిన ఇన్‌స్పెక్టర్ రిషి వెబ్‌సిరీస్ సీజన్ 2 రాబోతోంది” అని చెప్పారు.