1. వివాహిత దారుణ హత్య
2. మేడ్చల్ మండలం మునీరాబాద్‌లో ఘటన

మేడ్చల్, జనవరి24: మేడ్చల్ మండలం మునీరాబాద్ శివారులో వివాహిత దారుణ హత్యకు గురైన ఘటన శుక్రవారం వెలుగులోకి వచ్చింది. ఓఆర్‌ఆర్ సర్వీసు రోడ్డు బ్రిడ్జి కింద స్థానికులకు కాలిపోయిన మహిళ మృతదేహం కనిపించడంతో పోలీసులకు సమాచారం ఇచ్చారు.

మేడ్చల్ పోలీసులు ఘటనా స్థలంలో పరిశీలించగా.. మహిళను రాళ్లతో కొట్టి చంపిన ఆనవాళ్లు ఉన్నాయి. ఆతర్వాత పెట్రోలు పోసి తగులబెట్టారు. మృతదేహం గుర్తు పట్టడానికి వీలు లేకుండా కాలిపోయింది. క్లూస్ టీం ఆధారాలు సేకరించింది. మహిళ వయస్సు 25 నుంచి 30 ఏళ్లు ఉంటుందని.. గురువారం హత్య జరిగి ఉండవచ్చని అనుమానిస్తున్నారు.

కాగా మహిళ కుడిచేతి మీద శ్రీకాంత్ అని తెలుగులో, రోహిత్ అని ఇంగ్లిష్‌లో.. ఎడమ చేతి మీద నరేంద్ర అని ఇంగ్లిష్‌లో టాటూస్ ఉన్నాయి. ఓఆర్‌ఆర్ సమీపంలోని సీసీ ఫుటేజీలను పరిశీలిస్తున్నారు. పోలీసులు కేసు దర్యాప్తు చేస్తున్నారు.