సిద్దిపేట (విజయక్రాంతి): సిద్దిపేట జిల్లా కేంద్రంలో నిర్వహిస్తున్న బాలల వైజ్ఞానిక ప్రదర్శనకు హాజరైన విద్యార్థులకు, ఉపాధ్యాయులకు మధ్యాహ్న భోజనం ఏర్పాటు చేశారు. కానీ ఎన్ సిసీ విద్యార్థులకు మాత్రం భోజనాలు లేవంటూ గేటు బయట నిలబెట్టారు. ఉదయం నుంచి ఎన్ సిసీ విద్యార్థులు వైజ్ఞానిక ప్రదర్శన వద్దకు వస్తున్న ముఖ్య అతిథులందరికీ స్వాగతం పలికే పాత్ర వహించిన ఎన్ సీసీ విద్యార్థులకు భోజనాలు ఏర్పాటు చేయకపోవడం పట్ల ఆ విద్యార్థుల పాఠశాలల ఉపాధ్యాయులు నిర్వాహకులపై ఆగ్రహం వ్యక్తం చేశారు. భోజనాలు ఏర్పాటు చేసిన వద్దకు వెళ్లిన ఎన్ సిసి విద్యార్థులపై ప్రైవేట్ క్యాటరింగ్ నిర్వాహకులు దురుసుగా మాట్లాడడంతో విద్యార్థులు ఇబ్బందికి గురయ్యారు. అక్కడే ఉన్న కొందరు ఉపాధ్యాయులు కనీసం విద్యార్థులకు భోజనాలు ఏర్పాటు చేయాలంటూ కూడా సర్ది చెప్పకపోవడం గమనార్వం.