శేరిలింగంపల్లి డివిజన్ లోని సుదర్శన్ నగర్ లో ఘటన

శేరిలింగంపల్లి (విజయక్రాంతి): ఇంటి ముందు పార్క్ చేసి ఉన్న బైక్ లు చోరీకి గురైన సంఘటన గచ్చిబౌలి పోలీస్ స్టేషన్ పరిధిలో చోటు చేసుకుంది. పోలీసుల కథనం ప్రకారం.. రంగాపూర్ పరిగి, వికారాబాద్ రమాకాంత్ (30) ఉన్నత చదువుల కోసం హైదరాబాద్ నగరానికి వచ్చాడు. శేరిలింగంపల్లి డివిజన్ లోని సుదర్శన్ నగర్ లో నివాసం ఉంటూ హైదరాబాద్ సెంట్రల్ యూనివర్సిటీలో పిహెచ్డి చదువును కొనసాగిస్తున్నాడు. రోజు మాదిరిగానే తన కార్యక్రమాలు పూర్తిచేసుకుని తిరిగివచ్చి తన ఇంటి ముందు రెండు ద్విచక్ర వాహనాలను పార్కు చేశారు. మంగళవారం తెల్లవారుజామున ఇద్దరు గుర్తుతెలియని ఆగంతకులు తలకు హెల్మెట్ ధరించి సుదర్శన్ నగర్ కాలనీలోకి వచ్చి ఇంటి ముందు ఉన్న రెండు బైక్ లను చోరీ చేశారు. ఈ దృశ్యాలన్నీ కాలనీలో ఉన్న సీసీ కెమెరాల్లో రికార్డు అయ్యాయి. ఈ ఘటనకు సంబంధించి బాధితులు గచ్చిబౌలి పోలీసులకు ఫిర్యాదు చేశారు. బాధితుడి ఫిర్యాదు మేరకు సీసీటీవీ ఫుటేజ్ ల ఆధారంగా పోలీసులు కేసు నమోదు చేసుకుని దర్యాప్తు చేస్తున్నారు.