ప్రియదర్శి, నభా నటేష్ ప్రధాన పాత్రల్లో అశ్విన్ రామ్ దర్శకత్వం వహించిన చిత్రం ‘డార్లింగ్’. ప్రైమ్‌షో ఎంటర్‌టైన్‌మెంట్ పతాకంపై కె.నిరంజన్ రెడ్డి, శ్రీమతి చైతన్య నిర్మించిన ఈ చిత్రం ఈ నెల 19న విడుదల కానున్న తరుణంలో ఆదివారం ‘డార్లింగ్’ ట్రైలర్‌ను హీరో విశ్వక్‌సేన్ విడుదల చేశారు. విభిన్న నేపథ్యాలకు చెందిన ఒక యువ జంట కథతో రానున్న ఈ సినిమా ట్రైలర్ హాస్యభరిత సన్నివేశాలతో సాగింది.

ఒక మంచి అమ్మాయిని పెళ్లి చేసుకుని పారిస్‌లో హనీమూన్‌కి తీసుకెళ్ళాలనుకునే అమాయకుడైన హీరో జీవితంలో, ఆనంది అనే అమ్మాయి భార్యగా ప్రవేశించిన తర్వాత అతని జీవితం ఎలాంటి మలుపులు తిరిగింది అనేది తెరపై చూడాల్సి ఉంది. అనన్య నాగళ,్ల బ్రహ్మానందం, రఘుబాబు, కృష్ణతేజ తదితరులు నటించారు.

ట్రైలర్ లాంచ్ ఈవెంట్‌లో విశ్వక్ సేన్ మాట్లాడుతూ “కళామాతల్లికి దర్శి అంటే ఇష్టం అనుకుంటా. బలగం, మల్లేశం లాంటి సినిమాలు అందరికీ పడవు. రాసి పెట్టుండాలి. ఈ సినిమాతో నభా యాక్సిడెంట్ నుంచి కోలుకొని స్ట్రాంగ్ కమ్ బ్యాక్ ఇస్తోంది. ఇది చాలా మందికి ఇన్స్ ప్రెషన్. టీం అందరికీ ఆల్ ది బెస్ట్‌” అని చెప్పుకొచ్చారు. హీరో ప్రియదర్శి మాట్లాడుతూ “డైరెక్టర్ అశ్విన్ వలనే ‘డార్లింగ్’గా మీముందు ఉన్నా. డార్లింగ్ అనగానే ప్రభాస్ అన్న పేరు వస్తుంది. అలాంటి టైటిల్ పెట్టుకోవాలన్నా భయంగా ఉండేది. అయితే కథని నమ్మి దానికి ఈ టైటిల్‌ని ఖాయం చేశాం” అన్నారు.

హీరోయిన్ నభా నటేష్ మాట్లాడుతూ “యాక్సిడెంట్ నుంచి కోలుకున్న తర్వాత ఎలాంటి సినిమా చేయాలని ఆలోచిస్తున్నపుడు డార్లింగ్ కథ వచ్చింది. అశ్విన్ రాసిన క్యారెక్టర్ అద్భుతంగా వుంది. ఈ సినిమా కోసం చాలా మంచి టీం పనిచేశారు. ‘హనుమాన్’ సక్సెస్ ‘డార్లింగ్’ సినిమాతో కొనసాగుతుంది. ఇందులో దర్శిని సరికొత్తగా చూస్తారు. సినిమాని థియేటర్స్‌లో చూసి ఎంజాయ్ చేయండి” అన్నారు.