దర్శకుడు రామ్‌గోపాల్‌వర్మ గురించి ప్రత్యేకంగా చెప్పాల్సిన పనిలేదు. తనదైన శైలిలో సినిమాలు తీయడం ఆర్జీవీ ప్రత్యేకత. ఆయన సోషల్ మీడియాలో ఎంత యాక్టివ్‌గా ఉంటారో కూడా అందరికీ తెలుసు. ఎప్పుడూ సమాజంలో జరిగే సంఘటనలపై తనదైన శైలిలో స్పందిస్తూ ఉంటారు కూడా. అయితే కొద్దిరోజుల క్రితం చీర కట్టుకుని రీల్స్ చేసిన ఓ అమ్మాయి వీడియోలను ఆర్జీవీ అదే పనిగా సామాజిక మాధ్యమాల్లో షేర్ చేశారు. ఆ వీడియో కుర్రాళ్లు ఆరాధించేంతగా వైరల్ అయింది! అలా చీరకట్టుతో అందరినీ కట్టిపడేసిన ఆ కొత్తందమే ఇప్పుడు ఆర్జీవీ తెరకెక్కిస్తున్న ‘శారీ’ చిత్రంతో తెరపై మెరవనుంది.

ఆరాధ్యదేవి అనే స్క్రీన్ నేమ్‌తో నటిగా మారనున్న ఈ అమ్మడు అసలు పేరు శ్రీలక్ష్మి సతీశ్. ఈ శారీ సుందరి పేరు మార్పు ఆసక్తికరంగా జరిగింది. ఈ భామ వీడియోలు పోస్ట్ చేస్తూ.. ఈమె ఎవరో తెలుపాలని, తనపై ‘శారీ’ అనే సినిమా తీస్తానని ఆర్జీవీ అప్పట్లోనే ప్రకటించారు. ఇంకేముంది నెటిజన్స్ ఆ అమ్మాయి ఇన్‌స్టా ఐడీ కనుక్కొని వర్మకు రిప్లు ఇచ్చారు. చీరకట్టుతో తనను కట్టిపడేసిన ముద్దుగుమ్మ పేరు శ్రీలక్ష్మి సతీశ్ అని తెలుసుకున్న ఆర్జీవీ.. ఆ అమ్మాయిని అంత అందంగా వీడియోస్ తీసిన కెమెరామెన్‌ను పిలిపి మాట్లాడారట.

ఆర్జీవీ తన పేరు మార్చేయడంతో శ్రీలక్ష్మి.. చిన్నప్పట్నుంచి తన పేరుతో ఉన్న ఇన్‌స్టా అకౌంట్‌ను డిలీట్ చేయడం, ‘ఆరాధ్య దేవి’ పేరుతో అకౌంట్ క్రియేట్ చేయడం చకచకా పూర్తి చేసేసిందట. పలు నిజ జీవిత సంఘటనల మేళవింపుతో ఓ సైకలాజికల్ థ్రిల్లర్‌గా రూపొందుతున్న ‘శారీ’ చిత్రం తెరకెక్కుతోంది. చీరలో ఉన్న అమ్మాయిని చూసి పిచ్చివాడై ఆమెతో ప్రేమలో పడ్డ ఓ అబ్బాయి జీవితం ఎలా భయానకంగా మారిందన్నదే సినిమా ప్రధానాంశం.