‘కల్కి 2898 ఏడీ’కి సంబంధించిన మరో ట్రైలర్ వచ్చేసింది. రిలీజ్ ట్రైలర్  పేరుతో శుక్రవారం విడుదలైన ఈ రెండో ట్రైలర్ ద్వారా సినిమాలోని మూడు విభిన్న ప్రపంచాలను పరిచయం చేశారు మేకర్స్. ఫస్ట్ గ్లింప్స్ భారతీయ పురాణాల్లోని సినిమాటిక్ యూనివర్స్‌ను పరిచయం చేస్తే, తాజా ట్రైలర్ నటీనటుల అద్భుత అవతారాలను ఆవిష్కరించింది. ‘అశ్వత్థామ’గా అమితాబ్ బచ్చన్ డేరింగ్ స్టంట్స్, ‘యాస్కిన్’గా కమలహాసన్ గుర్తించలేనటువంటి డెడ్లీ అవతార్, ‘భైరవ’గా ప్రభాస్ బుజ్జితో కలిసి చేసిన పోరాటాలు ఎలా ఉండబోతున్నాయో ఇందులో చూడొచ్చు.

ఇక దీపికా పదుకొణె ‘సుమతి’గా, దిశా పటానీ ‘రాక్సీ’గా ఆకట్టుకున్నారు. ఈ ట్రైలర్ తెలుగు, హిందీ, తమిళం, మలయాళం, కన్నడ, ఇంగ్లిష్ తదితర భాషల్లో అందుబాటులో ఉందని చిత్రబృందం వెల్లడించింది. నాగ్ అశ్విన్ దర్శకత్వంలో తెరకెక్కుతున్న ఈ చిత్రం ఇదే నెల 27న ప్రపంచ వ్యాప్తంగా విడుదల కానున్నది.