శ్రీ జగన్మాత రేణుకా క్రియేషన్స్, ఫోర్ ఫౌండర్స్ పతాకాలపై బన్నీ అశ్వంత్ దర్శకత్వంలో సామా శ్రీధర్, పంజాల వెంకట్ గౌడ్ సంయుక్తంగా నిర్మించిన చిత్రం ‘రాజా మార్కండేయ’. ఈ చిత్రం ఆడియో ఆవిష్కరణ కార్యక్రమం తాజాగా హైదరాబాద్‌లో జరిగింది. ఈ కార్యక్రమంలో సీనియర్ హీరో సుమన్, ప్రతాని రామకృష్ణ గౌడ్, హీరో తేజస్ వీరమాచినేని, హీరోయిన్స్ రోమి, దేవిక, ప్రత్యూష, దర్శకుడు బన్నీ ఆశ్వంత్, నిర్మాతలు సామా శ్రీధర్, పంజల వెంకట్ గౌడ్ తదితరులు పాల్గొన్నారు. సినిమా ట్రైలర్‌ను సుమన్ లాంచ్ చేశారు. అనంతరం సుమన్ మాట్లాడుతూ.. “రాజా మార్కండేయ’ సినిమా సాంగ్స్ అన్నీ చాలా బాగున్నాయి. టీజర్, ట్రైలర్ చూస్తుంటే మంచి కంటెంట్ ను నమ్ముకొని తీసినట్టు వుంది.

అందరూ కొత్తవాళ్ళునా సినిమాలో మంచి కథ ఉందని అర్థమవుతోంది. చిత్రంలో శివయ్య పాట చాలా అద్భుతంగా ఉంది. రాబోయే శివరాత్రి పండుగకు ప్రతి దేవాలయంలో ఈ పాట మార్మోగుతుంది” అన్నారు. దర్శకుడు బన్నీ ఆశ్వంత్ మాట్లాడుతూ.. “ఈనాటి కలియుగంలో శివుడి భక్తుడైన మార్కండేయ జీవితంలో ఎలాంటి కష్టాలు ఎదురయ్యాయి? వాటిని శివుడి అనుగ్రహంతో ఎలా అధిగమించాడు? అనే కాన్సెప్ట్‌తో సినిమా రూపొందించా” అన్నారు. సామా శ్రీధర్ మాట్లాడుతూ.. “కథని నమ్ముకొని తీసిన సినిమా ఇది. ప్రతి ఒక్కరూ సినిమా కోసం అహర్నిశలు కష్టపడ్డారు. ఆడియన్స్‌కి సినిమా కచ్చితంగా నచ్చుతుంది” అన్నారు.