ప్రభాస్ అభిమానులు ఎదురుచూస్తున్న రోజు రానే వచ్చింది. ‘బాహుబలి’, ‘సలార్’, ‘కల్కి’ వంటి భారీ సినిమాల్లో యాక్షన్ సన్నివేశాలు, సీరియస్‌గా సాగే పాత్రల్లో ఆయన్ని చూసి సంతోషిస్తూనే.. ‘బుజ్జిగాడు’, ‘డార్లింగ్’ తరహాలో ప్రభాస్‌ని ఫన్ మోడ్‌లో మళ్లీ చూసేదెప్పుడా అని వారంతా ఎంతో కాలంగా వేచియున్నారు. వినోదాన్ని వండి వడ్డించడంలో తనదైన శైలి గల దర్శకుడు మారుతి చెవిన ఈ మాట పడింది కాబోలు.. ‘రాజాసాబ్’గా ప్రభాస్‌ని ఫాన్ ఇండియాకి చూపించేందుకు సన్నద్ధమయ్యారు. రొమాంటిక్ హారర్ కామెడీ జానర్‌లో తెరకెక్కుతన్న ఈ సినిమాని పీపుల్ మీడియా ఫ్యాక్టరీ పతాకంపై టీజీ విశ్వప్రసాద్ నిర్మిస్తున్నారు.

సోమవారం ఈ సినిమాలోని ప్రభాస్ పాత్రకి సంబంధించిన గ్లింప్స్‌ని విడుదల చేసిన చిత్ర బృందం.. 2025, ఏప్రిల్ 10న సినిమాను విడుదల చేస్తున్నట్టు అధికారికంగా ప్రకటించింది. గ్లింప్స్‌లో.. సైలిష్‌గా బైక్‌పై వచ్చి అద్దంలో చూసుకుని మురిసిపోయిన ప్రభాస్, తనకు తానే దిష్టి తీసుకోవడం తెరపైకి మునుపటి సందడిని తీసుకొస్తున్నారన్న భరోసానిచ్చింది. సినిమాలో ఇలాంటి గమ్మత్తులింకెన్ని ఉన్నాయో అన్న ఆసక్తిని రేపుతున్న ఈ సినిమా తెలుగు, తమిళ, కన్నడ, మలయాళ, హిందీ భాషల్లో విడుదల కానుంది.