అద్భుత భారతీయ ఆధునిక ఋషి రమణ మహర్షి. ప్రేమ గురించి ఆయన వెల్లడించిన అభిప్రాయాలు అందరూ గమనించదగ్గవి. ‘ప్రేమ అనేది కేవలం వ్యక్తిగత అనుభూతి కంటే కూడా చాలా ఎక్కువ’ అని ఆయన నమ్మారు. బదులుగా, దానిని ఆధ్యాత్మిక ఎదుగుదలకు శక్తివంతమైన సాధనంగా చూడాలి. అహంకారాన్ని విచ్ఛిన్నం చేసే మార్గంగా ప్రేమను మహర్షి చూశారు. సాధారణ అర్థంలో ప్రేమ గురించి వారు మాట్లాడలేదని మనం గ్రహించాలి. ఆధ్యాత్మికంగా మనల్ని వెనుకకు నెట్టివేసే అహంకారం వంటి దుర్లక్షణాల నుంచి విముక్తి పొందడానికి అది సహాయపడుతుందని అన్నారు.

ప్రేమపట్ల మహర్షి విధానం ‘స్వంత ఆధ్యాత్మిక ప్రయాణం గురించి మనం ఆలోచించే పద్ధతి’ని అనూహ్యంగా మార్చేస్తుంది. ప్రేమను కేవలం వట్టి భావోద్వేగంగానే చూడరాదు. మానవత్వం వైపు మనుషులను నడిపించే విశ్వజనీన భాషగా ప్రేమను చూడాలి. మన గురించి, మన చుట్టూ ఉన్న ప్రపంచాన్ని గురించి చక్కగా అర్థం చేసుకోవడానికి అది మనకు మార్గనిర్దేశనం చేస్తుంది. ఇంకా ప్రేమ అనేది మన మనసులోని రహస్యాలను వెలికి తీసే కీలక విషయమని కూడా ఆయన చెప్పారు.

ఒక విధంగా, మహర్షి నిజమైన ఆనందాన్ని, జ్ఞానాన్ని ఎలా కనుగొనాలో ఈ రకంగా మానవాళికి ఉద్బోధిస్తున్నారు. అంతిమంగా ప్రేమను ఒక మార్గదర్శిగా ఉపయోగించడం ద్వారా మనం స్వీయ -ఆవిష్కరణలోని సంక్లిష్ట మార్గాన్ని సులభతరం చేసుకోగలం. మనమందరం కోరుకునే శాంతికి, ప్రశాంత జీవనానికి దగ్గరగానూ వెళ్లగలం. ఆధ్యాత్మికత, వ్యక్తిగత వృద్ధిపై ఆసక్తి ఉన్న ఎవరికైనా ఇది శక్తివంతమైన సందేశంగా పనికి వస్తుంది.

మహర్షి ప్రేమ తత్త్వం..

అద్వైత వేదాంతం అనే ప్రాచీన భారతీయ బోధనను అనుసరించిన తత్త్వవేత్తగా రమణ మహర్షిని పేర్కొనాలి. మనలో ఉద్భవించే ‘స్వచ్ఛమైన ప్రేమ’ వాస్తవానికి మనమెవరో తెలుపడంలో కీలక భూమిక వహిస్తుంది. అది దైవిక లేదా ఆధ్యాత్మిక సారాంశంతో సమానమనీ ఆయన నమ్మారు. ‘నేను ఎవరు?’ అనే ప్రశ్నతో మనల్ని మనం అర్థం చేసుకోవడానికి ప్రయత్నించాలి. ప్రేమను విభిన్నంగా చూడడంలో రమణ మహర్షి ఆలోచనలు మనకు సహాయ పడతాయి.

ప్రేమను కేవలం అనుభూతిగా భావించే బదులు, విశ్వంలోని ప్రతిదీ దానితో అనుసంధానితమైందనే బృహత్ విషయానికి ఒక సంకేతంగా చూడాలన్నది వారి సందేశం. ఆ క్షణంలో మనకు కలిగే ప్రేమ మనం చూస్తున్న అందచందాల గురించి మాత్రమే కాదు, మొత్తం విశ్వంతో లోతైన సంబంధాన్ని అనుభూతి చెందేలా చేస్తుంది. మహర్షి మాట్లాడుతున్న ప్రేమ అంత విస్తృతమైంది, విశాలమైంది కూడా.

-విశ్వమానవ భాషగా..

ప్రేమ అనేది అందరికీ అర్థమయ్యే సాధారణ భాష వంటిది. మీరు ఎక్కడి నుంచి వచ్చారో లేదా మీరు ఏ భాష మాట్లాడుతున్నారో పట్టింపు లేదు; ప్రేమ అన్నింటిని మించింది. రమణ మహర్షి ఒక ఆధ్యాత్మిక గురువు. ప్రేమ అనేది కేవలం అనుభూతికంటే ఎక్కువ ఆయన నమ్మారు. ‘ప్రతి ఒక్కరినీ, ప్రతి దానికీ (ప్రకృతికి) కనెక్ట్ అయ్యేలా చేసేది..’ అని ఆయన భావించారు.

ప్రపంచంతో అనుసంధానితమైన ఒక మహోన్నత అనుభూతిగా ప్రేమను భావించాలి. అనేక విధాలుగా విభిన్నంగా ఉన్నప్పటికినీ, ఒకరినొకరు బాగా అర్థం చేసుకోగల శక్తి ప్రేమకు ఉంటుందని ఆయన భావించారు.

ఎవరైనా అవసరంలో ఉన్న ఇతరులకు సహాయం చేయడానికి స్వచ్ఛందంగా ముందుకు వచ్చినప్పుడు, వారు కేవలం మాటలతో కాకుండా చర్యలద్వారా ప్రేమను చూపుతున్నట్టు లెక్క. ఈ రకమైన నిస్వార్థ ప్రేమ అపరిచితుల మధ్య స్నేహాన్ని, నమ్మకాన్ని ఏర్పరుస్తుంది.

ఇది వేరొకరి కోసం అర్థవంతమైంది ఏదైనా చేయడం గురించేకాక ఇంకా వారి జీవితంలో పెద్ద మార్పును కలిగించడానికి దోహదపడుతుంది. ప్రేమ ఇంతగా శక్తివంతమైంది. మనం ఒకరినొకరం చూసుకునే, ప్రవర్తించే విధానాన్ని మార్చగలదు. ఎట్టకేలకు అందరం ఒక పెద్ద కుటుంబంలో భాగమే అన్న భావనకు రాగలుగుతాం.

ఆత్మ పరిశీలనతోనే సాధ్యం

రమణ మహర్షి వంటి ఆధ్యాత్మిక గురువులు సూచించినట్లుగా, స్వీయ విచారణ ద్వారా మన హృదయాన్ని లోతుగా పరిశోధించడం మొదలుపెట్టాలి. ఫలితంగా ప్రేమ లోతైన సంబంధాన్ని ఆవిష్కరిస్తుంది. ఆత్మ సాక్షాత్కారానికి మార్గంగా స్వీయ విచారణ ప్రాముఖ్యాన్ని మహర్షి వారు నొక్కి చెప్పారు. దీనిని సత్యానికి మూలమైన హృదయంతో సమానం చేశారు.

ఈ ఆత్మ పరిశీలన అభ్యాసం ఉపరితల గుర్తింపులకు అతీతంగా ‘నేను ఎవరు?’ అని నిలకడగా ప్రశ్నించుకోవడం ద్వారా సాధ్యమవుతుంది. ఆయన బోధనలకు అనుగుణంగా కరుణ, ఐక్యతతో ప్రతిధ్వనించే హృదయాన్ని బహిర్గతం చేస్తూ మనలోని అహాన్ని కరిగించి వేద్దాం. అదెలా అంటే, ప్రేమను పదిమందికి పంచడం ద్వారా! ప్రేమతో అహంకారాన్ని జయిద్దాం.