స్టార్ హీరో శర్వానంద్ మరో ఫ్యామిలీ ఎంటర్‌టైనర్‌తో మెప్పించేందుకు సిద్ధమవుతున్నాడు. ఆయన కథానాయకుడిగా నటిస్తున్న ‘నారి నారి నడుమ మురారి’ చిత్రాన్ని ‘సామజవరగమన’ ఫేమ్ రామ్ అబ్బరాజు దర్శకత్వం వహిస్తున్నారు. ఈ సినిమా షూటింగ్ దాదాపు పూర్తయ్యే దశలో ఉంది. అనిల్ సుంకర ఏకే ఎంటర్‌టైన్‌మెంట్స్ బ్యానర్‌పై రామబ్రహ్మం సుంకర, అడ్వెంచర్స్ ఇంటర్నేషనల్ ప్రైవేట్ లిమిటెడ్‌తో కలిసి నిర్మిస్తున్నారు. ఈ చిత్రంలో సాక్షి వైద్య, సంయుక్త కథానాయికలుగా నటిస్తున్నారు. ఇప్పటికే, సినిమా నుంచి ఫస్ట్‌లుక్, ఇతర ప్రచార చిత్రాలు విడుదలై మంచి బజ్ క్రియేట్ చేశాయి. తాజాగా ఇప్పుడు మేకర్స్ సినిమా ఫస్ట్ సింగిల్‌కు సంబంధించి అప్డేట్ ఇచ్చారు.

ఈ సినిమా మ్యూజిక్ జర్నీ ఏప్రిల్ 7న విడుదల కానున్న ‘దర్శనమే..’ గీతంతో ప్రారంభం కానుంది. శర్వా, సంయుక్తపై చిత్రీకరించిన ఈ పాట విశాల్ చంద్రశేఖర్ సంగీత సారథ్యంలో రూపుదిద్దుకుంది.  సాంగ్ అనౌన్స్‌మెంట్ పోస్టర్‌లో శర్వా, సంయుక్త రొమాంటిక్ బైక్ రైడ్‌ను ఆస్వాదిస్తున్నారు. శర్వా క్యాజువల్ టీషర్ట్, బ్లాక్ ప్యాంటులో చాలా స్టైలిష్‌గా కనిపిస్తుండగా, సంయుక్త సాంప్రదాయ దుస్తులు ధరించి తన అందంతో ఆకర్షిస్తోంది. ఈ చిత్రానికి బ్యానర్లు: ఏకే ఎంటర్‌టైన్‌మెంట్స్, అడ్వెంచర్స్ ఇంటర్నేషనల్ ప్రైవేట్ లిమిటెడ్; డీవోపీ: జ్ఞానశేఖర్ వీఎస్, యువరాజ్; సంగీతం: విశాల్ చంద్రశేఖర్; కథ: భాను బోగవరపు; మాటలు: నందు సవిరిగాన; సహ నిర్మాత: అజయ్ సుంకర; ఎగ్జిక్యూటివ్ నిర్మాత: కిషోర్ గరికిపాటి; నిర్మాతలు: అనిల్ సుంకర, రామబ్రహ్మం సుంకర; స్క్రీన్ ప్లే రామ్ అబ్బరాజు.