పీకేఎల్ 11వ సీజన్

నోయిడా: ప్రొ కబడ్డీ లీగ్ (పీకేఎల్) 11వ సీజన్ రివేంజ్ వీక్‌లో భాగంగా నోయిడా వేదికగా జరిగిన మ్యాచ్‌లో జైపూర్ పింక్ పాంథర్స్ 37-23 తేడాతో పునేరి పల్టన్ మీద ఘన విజయం సాధించింది. జైపూర్ కెప్టెన్ అర్జున్ దేశ్వాల్ 16 పాయింట్లతో సత్తా చాటాడు. పునేరిలో ఒక్క రైడర్ కూడా సూపర్ టెన్ సాధించలేకపోయాడు.

ఈ రెండు జట్ల మధ్య గతంలో జరిగిన మ్యాచ్‌లో జైపూర్ జట్టునే విజయం వరించగా.. సోమవారం కూడా ఆ జట్టే సత్తా చాటింది. మరో మ్యాచ్‌లో యూముంబా 34-32 తేడాతో బెంగళూరు బుల్స్‌పై విజయం సాధించింది. ఒకానొక దశలో యూ ముంబా సులభంగా విజయం సాధిస్తుందని అనిపించినా కానీ చివర్లో బెంగళూరు రెయిడర్లు, డిఫెండర్లు సత్తా చాటడంతో మ్యాచ్ ఉత్కంఠగా మారింది.

బెంగళూరు గెలిచే దశకు చేరుకున్న తరుణంలో ముంబా రెయిడర్ మంజీత్ చేసిన సూపర్ టాకిల్ ఆట గతినే మార్చేసింది. ఈ టాకిల్ వల్ల ఆలౌట్ కావాల్సిన ముంబా జట్టు విజయం సాధించింది. స్టార్ రెయిడర్ పర్దీప్ నర్వాల్ 6 పాయింట్లతో సత్తా చాటాడు. నేటి మ్యాచ్‌ల్లో యూపీతో తమిళ్ తలైవాస్, దబంగ్ ఢిల్లీతో పట్నా తలపడనున్నాయి.