రాష్టంలో రాజకీయ పార్టీల మధ్య సవాళ్లు.. ఒకరిపై ఒకరు విమర్శలు, ప్రతి విమర్శలు చేసుకోవడం సహజమే. ఈ మధ్య మూసీ పునరుజ్జీవం విషయంలో అధికార కాంగ్రెస్, ప్రధాన ప్రతిపక్ష బీఆర్‌ఎస్‌తోపాటు బీజేపీ మధ్య పాదయాత్రలు, బస్తీ బాటలతోపాటు కొత్తగా నిద్ర యాత్రలు చేస్తామంటూ రాజకీయ వేడిని రగిలిస్తున్నాయి.

ఇన్ని సమస్యలు, సవాళ్లు ఉన్నప్పటికి.. మంత్రి పొంగులేటి శ్రీనివాస్‌రెడ్డి బీఆర్‌ఎస్ వర్కింగ్ ప్రెసిడెంట్ కేటీఆర్‌ను ఉద్దేశించి చేసిన ‘బాంబు పేలుతుంది’ డైలాగ్ మాత్రం నిత్యం నాయకులు, ప్రజల్లో చర్చనీయాంశంగానే ఉంది. దీపావళి పండుగ వచ్చే.. ప్రజలు పటాకులు పేల్చి సంబురాలు అయిపాయే..

కానీ, పొంగులేటి చెప్పిన ‘బాంబు’ ఇంకా పేలకపాయే అని నిట్టూర్పులు వినిపిస్తున్నాయి. పొంగులేటి చెప్పినట్టు బాంబు పేలుతుందా? తుస్సుమన్నదా? అనేదానిపై రాజకీయ వర్గాల్లో ఆసక్తికరమైన చర్చ జరుగుతోంది. బీఆర్‌ఎస్ వర్కింగ్ ప్రెసిడెంట్ కేటీఆర్ కూడా బాంబు అంశాన్ని అప్పుడప్పుడు చర్చకు తెస్తుండటం గమనార్హం.