పీకేఎల్ 11వ సీజన్

నోయిడా: ప్రొ కబడ్డీ లీగ్ (పీకేఎల్) 11వ సీజన్‌లో తెలుగు టైటాన్స్ తన జోరును ప్రదర్శిస్తోంది. టోర్నీలో ఎనిమిదవ విజయం సాధించిన టైటాన్స్ పట్టికలో రెండో స్థానానికి దూసుకొచ్చింది. గురువారం నోయిడా వేదికగా జరిగిన తొలి మ్యాచ్‌లో తెలుగు టైటాన్స్ 31-29 తేడాతో బెంగాల్ వారియర్స్‌పై విజయం సాధించింది. టైటాన్స్ తరఫున విజయ్ మాలిక్ 14 పాయింట్లతో మెరిశాడు.

బెంగాల్ తరఫున ప్రణయ్ రానే 9 పాయింట్లు సాధించాడు. మరో మ్యాచ్‌లో హర్యానా స్టీలర్స్ 32-26 తేడాతో బెంగళూరు బుల్స్‌పై విజయాన్ని అందుకుంది. హర్యానా రైడర్ వినయ్ 12 పాయింట్లతో టాప్ స్కోరర్‌గా నిలిచాడు. బెంగళూరు రైడర్ అక్షిత్ 7 పాయింట్లు సాధించాడు. నేటి మ్యాచ్‌ల్లో తమిళ్ తలైవాస్‌తో యూపీ యోధాస్, జైపూర్ పింక్ పాంథర్స్‌తో దబంగ్ ఢిల్లీ తలపడనుంది.