అల్లరి నరేశ్ హీరోగా నటిస్త్తున్న తాజా యాక్షన్ ఎంటర్‌టైనర్ ‘బచ్చల మల్లి’. సుబ్బు మంగదేవి ఈ చిత్రానికి దర్శకత్వం వహిస్తున్న ఈ చిత్రంలో అమృత అయ్యర్ కథానాయిక. హాస్య మూవీస్ బ్యానర్‌పై రాజేశ్ దండా, బాలాజీ గుత్తా నిర్మిస్తున్న ఈ సినిమా క్రిస్మస్ సందర్భంగా డిసెంబర్ 20న విడుదల కానుంది. ఈ నేపథ్యంలో మూవీ టీజర్ లాంచ్ ఈవెంట్‌ను చిత్రబృందం గురువారం హైదరాబాద్‌లో వేడుకగా నిర్వహించింది.

ఈ సందర్భంగా అల్లరి నరేశ్ మాట్లాడుతూ.. “గమ్యం’, ‘నాంది’లాగే ‘బచ్చలమల్లి’ కూడా ప్రేక్షకుల మనసులో నిలిచిపోతుంది‘’ అన్నారు. “బచ్చలమల్లి’ సినిమాకు పనిచేయడం వండర్ఫుల్ ఎక్స్‌పీరియన్స్’ అని హీరోయిన్ అమృత అయ్యర్ తెలిపారు. డైరెక్టర్ సుబ్బు మంగదేవి మాట్లాడుతూ.. ‘ఈ సినిమా మూడేళ్ల కష్టం. కరోనా సమయంలో హాస్పిటల్లో ఉన్న మా అమ్మను చూడడానికి సరైన సమయంలో వెళ్లలేకపోయా. వెళ్లేటప్పడికి అదే చివరి చూపు అయింది.

అప్పుడే అర్థమైంది జీవితంలో వెనక్కి వెళ్లి సరిదిద్దుకోలేని తప్పు చేయకూడదు కదా అని! ఇలాంటి పాయింట్ మీద ఒక కథ చెప్పాలనిపించింది. నరేశ్ లేకపొతే బచ్చలమల్లి అనే క్యారెక్టర్ లేదు.. నేనెలా చేయమంటే అలా చేశారు. అమృత చేసిన కావేరి పాత్రతో అందరూ కనెక్ట్ అవుతారు. విశాల్ అద్భుతమైన మ్యూజిక్ ఇచ్చారు’ అన్నారు. ‘ఈ కథ విన్నప్పుడు కళ్లలో నీళ్లు వచ్చాయి. చాలా ప్రేమించి చేసిన సినిమా’ అని నిర్మాత రాజేశ్ దండా తెలిపారు. ఇంకా యాక్టర్ ప్రసాద్ బెహరా, డీవోపీ రిచర్డ్, ఎడిటర్ చోటా కే ప్రసాద్, ఆర్ట్ డైరెక్టర్ బ్రహ్మ కడలి తదితరులు పాల్గొన్నారు.