న్యూఢిల్లీ: కల్తీ కల్తీ ఏది తిన్నా కల్తీ. నేటి సమాజంలో బైట ఏది తిన్నా ఎప్పుడు ఏమవుతుందో ఎవరికి తెలియదు. బయట స్ట్రీట్ ఫుడ్ తిని ప్రాణాలు పోయిన ఘటనలు ఎన్నో ఉన్నాయి. ఈ విషయం గురించి మనం అనుకోవడం కాదు..  కేంద్ర ఆరోగ్య మంత్రిత్వ శాఖ తాజాగా సంచలన ప్రకటన చేసింది. ఆహార కల్తీ సంఘటనలలో దక్షిణ భారత రాష్ట్రాలలో తెలంగాణ రెండవ(Telangana ranks second) స్థానంలో ఉందని కేంద్ర ఆరోగ్య, కుటుంబ సంక్షేమ మంత్రిత్వ శాఖ పార్లమెంటుకు సమర్పించిన డేటా తెలిపింది. 2021- 2024 మధ్య దేశవ్యాప్తంగా నిర్వహించిన ఆహార నమూనా పరీక్షలో ఈ డేటా బయటకు వచ్చింది. 

గత నాలుగు సంవత్సరాలలో దేశవ్యాప్తంగా సేకరించిన ఆహార నమూనాలలో సగటున 22 శాతం కల్తీ జరిగినట్లు తేలిందని నివేదిక పేర్కొంది. దక్షిణాది రాష్ట్రాలలో, తమిళనాడు అగ్రస్థానంలో ఉండగా, దాని ఆహార నమూనాల పరీక్షలో 20 శాతం కల్తీ జరిగింది. తెలంగాణ 14 శాతం కల్తీ రేటుతో తరువాతి స్థానంలో ఉంది. అంటే రాష్ట్రంలో సేకరించి పరీక్షించిన ప్రతి 100 ఆహార నమూనాలలో 14 కల్తీ జరిగినట్లు తేలింది. కేరళ 13.11 శాతం కల్తీ రేటును నివేదించింది. ఇది దక్షిణాది రాష్ట్రాలలో మూడవ స్థానంలో ఉంది. ఆంధ్రప్రదేశ్ 9 శాతం రేటుతో నాల్గవ స్థానంలో ఉంది. తరువాత కర్ణాటక 6.30 శాతంతో ఉంది. ఈ ఫలితాలు భారత రాష్ట్రాలలో నిర్వహించి కేంద్ర ప్రభుత్వం పార్లమెంటుకు సమర్పించిన ఆహార భద్రత తనిఖీలపై వివరణాత్మక డేటాలో భాగంగా ఉన్నాయి.