హైదరాబాద్: రేపటి నుంచి తెలంగాణ అసెంబ్లీ బడ్జెట్ సమావేశాలు(Telangana Assembly Budget Session) ప్రారంభం కానున్నాయి. సభ సజావుగా జరిగేలా చర్యలు తీసుకోవాలని తెలంగాణ స్పీకర్  గడ్డం ప్రసాద్ కుమార్ అధికారులను  ఆదేశించారు. పది రోజులకంటే ఎక్కువ రోజులు అసెంబ్లీ సమావేశాలు జరిగే అవకాశముంది. అసెంబ్లీ ఎన్ని రోజులు నడపాలో ఇవాళ్టి బీఏసీలో నిర్ణయం తీసుకోనున్నారు. మార్చి 12న ప్రారంభం కానున్న అసెంబ్లీ బడ్జెట్ సమావేశాలకు బీఆర్ఎస్ అధినేత, మాజీ ముఖ్యమంత్రి కల్వకుంట్ల చంద్రశేఖర్ రావు(Kalvakuntla Chandrashekar Rao) హాజరయ్యే అవకాశం ఉన్నట్లు పార్టీ వర్గాలు తెలిపాయి.

రాబోయే అసెంబ్లీ సమావేశం, ఎమ్మెల్యేల కోటా కింద ఎమ్మెల్సీ ఎన్నికలు, గులాబీ పార్టీ రజతోత్సవ వేడుకలపై చర్చించడానికి శుక్రవారం సిద్ధిపేట జిల్లాలోని ఎర్రవల్లి ఫామ్‌హౌస్‌లో ప్రతిపక్ష నాయకుడు తన పార్టీ సహచరులతో సమావేశం నిర్వహించిన విషయం తెలిసిందే. ఈ సమావేశంలో, 2023 అసెంబ్లీ ఎన్నికల సమయంలో తెలంగాణ ప్రజలకు(Telangana people ) ఇచ్చిన ఆరు హామీలు, ఇతర వాగ్దానాలను అమలు చేయడంలో విఫలమైనందుకు అధికార కాంగ్రెస్‌ను ఇరుకున పెట్టడానికి సిద్ధం కావాలని మాజీ సీఎం పార్టీ ఎమ్మెల్యేలు, ఎమ్మెల్సీలను ఆదేశించినట్లు సమాచారం. ఏప్రిల్ 27న వరంగల్‌లో జరగనున్న బహిరంగ సభ, ఏప్రిల్ 10న హైదరాబాద్‌లో నిర్వహించనున్న పార్టీ ఏడాది పొడవునా రజతోత్సవ వేడుకలు, ప్లీనరీ గురించి చర్చించడానికి కేసీఆర్(KCR) తన పార్టీ సహచరులతో ప్రణాళికలను చర్చించారని గులాబీ వర్గాలు తెలిపాయి.