న్యూఢిల్లీ: దేశ రాజధాని ఢిల్లీలో ఆదివారం తెల్లవారుజామున  షాకింగ్ ఘటన చోటుచేసుకుంది. దక్షిణ ఢిల్లీలోని హౌజ్ ఖాస్ ప్రాంతంలోని సఫ్దర్‌జంగ్ ఎన్‌క్లేవ్‌లోని డీర్ పార్క్(Delhi's Deer Park) వద్ద ఒక టీనేజర్ బాలుడు, బాలిక చెట్టుకు వేలాడుతూ కనిపించారు. ఇది ఆత్మహత్య కేసుగా పోలీసులు అనుమానిస్తున్నారు. పోలీసులు తెలిపిన వివరాల ప్రకారం, డీర్ పార్క్ సెక్యూరిటీ గార్డు నుండి ఉదయం 6:31 గంటలకు మృతదేహాల గురించి పీసీఆర్ కాల్ వచ్చింది.

సుమారు 17 సంవత్సరాల వయస్సు గల బాలుడు నల్లటి టీ-షర్టు, నీలిరంగు జీన్స్ ధరించి ఉన్నాడు, అదే వయస్సు గల బాలిక ఆకుపచ్చ రంగు దుస్తులు ధరించిందని పోలీసులు తెలిపారు. ఇద్దరు నైలాన్ తాడును ఉపయోగించి చెట్టు కొమ్మకు ఉరివేసుకుని ప్రాణాలు తీసుకున్నారు.  బాధితుల గుర్తింపులను, సంఘటనకు దారితీసిన పరిస్థితులను తెలుసుకోవడానికి దర్యాప్తు అధికారులు ప్రయత్నిస్తున్నారని, ఇప్పటివరకు ఎటువంటి సూసైడ్ నోట్ లభించలేదని ఒక అధికారి తెలిపారు. అధికారులు సీసీటీవీ ఫుటేజ్‌లను పరిశీలిస్తున్నారు. దర్యాప్తు కోసం క్రైమ్ టీమ్‌ను పిలిపించి, తదుపరి పరీక్ష కోసం మృతదేహాలను మార్చురీకి తరలించారు. కేసు నమోదు చేసి దర్యాప్తు కొనసాగిస్తున్నామని పోలీసులు తెలిపారు.